މަޖިލީހުގެ ރުހުން ނެތި ބޭރުގެ ސިފައިންނަށް ރާއްޖޭގައި ނުތިބެވޭ ގޮތް ހަދަނީ

ރާއްޖޭގައި ބޭރު ސިފައިން ބައިތިއްބާ ނަމަ މަޖިލިހުގެ ރުހުން ހޯދަށްޖެހޭ ގޮތަށް ގާނޫނުއަސާސީއަށް އިސްލާހު ގެނައުމަށް ސަރުކާރުން ހުށަހަޅައިފިއެވެ.

މި އިސްލާހު ހުށަހަޅާފައިވަނީ ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދެވެ. މި ބިލު ރައްޔިތުންގެ މަޖިލީހުގެ މިއަދުގެ ޖަލްސާއަށް ވަނީ އެޖެންޑާ ކުރެވިފައެވެ.

މި އިސްލާހުގެ ދަށުން، ރައްޔިތުންގެ މަޖިލީހުގެ ޖުމުލަ މެންބަރުންގެ އަޣުލަބިއްޔަތުން ރުހުން ދީގެން މެނުވީ އަސްކަރީ ބޭނުމަށް ބޭރުގެ ބަޔަކަށް ރާއްޖޭގެ އެއްވެސް ތަނެއް ދިނުމާއި، އެއްވެސް ސިފައެއްގައި ހަރަކާތްތެރިވުމުގެ ހުއްދަ ދިނުން މަނާވާނެއެވެ.

މިހާރު މަޖިލީހުގައި 93 މެންބަރުން ތިއްބަވާއިރު، މި އިސްލާހު ފާސްވެއްޖެނަމަ، ބޭރުގެ ސިފައިން ރާއްޖޭގައި ބޭތިއްބުމަށް ހުއްދަ ދެވޭނީ މަދުވެގެން 47 މެންބަރުންގެ ވޯޓު ލިބިގެންނެވެ.

ރައީސް މުހައްމަދު މުއިއްޒުގެ ސިޔާސަތަކީ ބޭރުގެ ސިފައިން ރާއްޖޭގައި ގާއިމުވެ ތިބުމުގެ ހުއްދަ ނުދިނުމެވެ. މީގެ ކުރިން ރާއްޖޭގައި ތިބި އިންޑިއާގެ ސިފައިން ފޮނުވާލުމަށްފަހު، އިންޑިއާއިން ހަދިޔާކޮށްފައިވާ އަސްކަރީ އުޅަނދުތައް ދުއްވުމަށް މިހާރު ވަނީ އެ އުޅަނދުތައް އުފެއްދި ކުންފުނީގެ މަދަނީ މުވައްޒަފުން ގެނެސްފައެވެ.