14 ގަޑިއިރުގެ ބަހުސަށްފަހު ބަޖެޓް ބަހުސް ނިންމާލައިފި

އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހެޅި 56.6 ބިލިއަން ރުފިޔާގެ ބަޖެޓަށް 14 ގަޑިއިރު ބަހުސްކޮށް މިރޭ ބަޖެޓް ބަހުސް ނިންމާލައިފިއެވެ.

ކުރިއަށް އޮތް 2025 ވަނަ އަހަރަށް ލަފާކޮށް 56.6 ބިލިއަން ރުފިޔާގެ ބަޖެޓެއް ސަރުކާރުން ރައްޔިތުންގެ މަޖިލީހަށް ހުށަހެޅީ މިދިޔަ އޮކްޓޫބަރު މަހުގެ 31 ވަނަ ދުވަހުއެވެ.

މި ބަޖެޓް ބަހުސް ފަށާފައި ވަނީ މިދިޔަ ބުރާސްފަތި ދުވަހުއެވެ.

ހަތަރު ދުވަހުން 77 މެމްބަރުން ބަޖެޓް ބަހުސްގައި ވާހަކަ ދައްކާފައިވާ ކަމަށާއި 14 ގަޑިއިރާއި 17 މިނެޓް މެންބަރުން ބަހުސްގައި ހޭދަކުރައްވާފައިވާ ކަމަށް ޖަލްސާ ނިންމަވައިލައްވަމުން މަޖިލީހުގެ ނާއިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމު ވިދާޅުވިއެވެ.

އަންނަ އަހަރަށް ލަފާކުރާ ބަޖެޓުގައި ހަރަދުގެ ގޮތުގައި ހިމެނެނީ 49.2 ބިލިއަން ރުފިޔާގެ އިތުރުން ރިކަރަންޓް ހަރަދުގެ ގޮތުގައި 35.9 ބިލިއަން ރުފިޔާއެވެ. އަދި ކެބިޓަލް ހަރަދުގެ ގޮތުގައި 13.3 ބިލިއަން ރުފިޔާ ބަޖެޓުގައި ކަނޑައަޅާފައިވެއެވެ.

އަންނަ އަހަރުގެ ބަޖެޓުގައި ހަމައެކަނި ތަރައްގީގެ މަޝްރޫއުތަކަށް 12.4 ބިލިއަން ރުފިޔާ ކަނޑައަޅާފައިވެއެވެ.

ރައްޔިތުންގެ މަޖިލީހުގެ ޖަލްސާއަށް ބަޖެޓް ހުށަހަޅުއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވީ މި ހަރަދުތަކުގެ އިތުރުން ބަޖެޓުގައި މައިގަނޑު ގޮތެއްގައި ހިމެނެނީ ދައުލަތުގެ ދަރަނި އަދާކުރުމަށް ބޭނުންވާ 3.9 ބިލިއަން ރުފިޔާ އާއި ސަރުކާރު ކުންފުނިތަކަށް ކެޕިޓަލް ދޫކުރުމާއި އެހެނިހެން އިންވެސްޓްމަންޓްތައް ކުރުމަށް ހިނގާނެ 378 މިލިއަން ރުފިޔާ އާއި ސަރުކާރުން ލޯނު ދޫކުރުމަށް ކަނޑައަޅާފައިވާ 3.2 ބިލިއަން ރުފިޔާ ހިމަނާފައިވާނެ ކަމަށެވެ.

މި ބަޖެޓަށް ސަރުކާރުން ކިޔަނީ ބޯހިޔާވަހިކަމުގެ ބަޖެޓެވެ. އެއީ ބަޖެޓްގައި ބޯހިޔާވެހި ކަމަށް ނުހަނު ބޮޑު އިސްކަމެއް ދީފައިވާތީ އެވެ.