ވިއްސާރައިގައި ރާއްޖޭގެ ބައެއް ރަށްރަށަށް ބޮޑެތި ގެއްލުންތަކެއް ވެއްޖެ

ރާއްޖެއަށް މިހާރު ކުރަމުންދާ ވިއްސާރައިގައި ދެކުނާއި މެދުރާއްޖެތެރޭގެ ބައެއް ރަށްރަށުގެ ގެތަކަށް ބޮޑެތި ގެއްލުންތައް ލިބިފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ.

ގެއްލުން ލިބުނު ރަށްތަކުގެ ތެރޭގައި ދ.ބަނޑިދޫ، ޅ.ކުރެންދޫ، އަދި ސ.ފޭދޫ ހިމެނެއެވެ.

ދ. ބަނޑިދޫގައި ގެއެއްގެ ބަދިގޭ ފުރާޅުން ބައެއް އެއްލައިލުމުގެ ސަބަބުން ބަދިގެއާއި ގޭގެ ސާމާނަށް ގެއްލުންވެފައިވާ ކަމަށް އެންޑީއެމްއޭއިން ބުނެފައިވެއެވެ. މި ގޭގައި ދިރިއުޅެމުން އައި 7 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށްވެސް އެ އޮތޯރިޓީން ހާމަކޮށްފައިވެއެވެ.

އައްޑޫ ސިޓީ ފޭދޫގައިވެސް ގެއެއްގެ ފުރާޅަށް ގެއްލުންވެ، ސީލިންގަށް ފެން އެޅި، ސީލިންގު ވެއްޓިފައިވާކަމަށް އެންޑީއެމްއޭއިން ބުނެފައިވެއެވެ. މި ގޭގެ ފުރާޅު މަރާމާތުކުރުމުގެ މަސައްކަތްވެސް އެ އޮތޯރިޓީން ވަނީ ކޮށްފައެވެ.

ޅ. ކުރެންދޫއަށް ބޯކޮށް ވާރޭވެހި ރަށުތެރޭގައި ފެން ބޮޑުވުމާ ގުޅިގެން ސިފައިންގެ އެހީތެރިކަމާއެކު ފެން ހިންދުމުގެ މަސައްކަތް ކުރެވުނު ކަމަށް އެންޑީއެމްއޭއިން ބުނެފައިވެއެވެ. ފެން ބޮޑުވުމުގެ ސަބަބުން 104 ގެއަކަށް ގެއްލުން ލިބިފައިވާއިރު، ލިބުނު ގެއްލުންތައް ދެނެގަތުމުގެ މަސައްކަތް ކުރަމުންދާ ކަމަށްވެސް އެ އޮތޯރިޓީން ހާމަކޮށްފައިވެއެވެ.

އެންޑީއެމްއޭއިން ވަނީ ގަދަވަޔާއެކު ވިއްސާރަކުރާ ދުވަސްވަރު ދިމާވެދާނެ ހާދިސާތަކަށް ރައްކާތެރިވުމަށް ދުރާލާ ފިޔަވަޅު އެޅުމަށް އާންމުންނަށް އިރުޝާދު ދީފައެވެ. މީގެ ތެރޭގައި ގޭގޭ ފުރާޅު ރައްކާތެރިކުރުމާއި، ކަރަންޓު ބޭނުންކުރާ ތަކެތި ނިންވާލުން، އަދި ކަނޑު ދަތުރުފަތުރުގައި ސަލާމަތީ ފިޔަވަޅުތައް އެޅުން ހިމެނެއެވެ.