ހުޅުމާލޭ މޫދުގައި ކުޑަކުއްޖަކަށް ޖިންސީ ގޯނާކުރި މައްސަލަ ފުލުހުން ބަލަން ފަށައިފި

ހުޅުމާލޭގައި މޫދަށް އެރި އުޅުނު ކުޑަކުއްޖަކަށް ޖިންސީ ގޯނާ ކުރި ކަމަށް ތުހުމަތުވާ މައްސަލައެއް ފުލުހުން ބަލަން ފަށައިފިއެވެ.

ފުލުހުން ބުނެފައިވާ ގޮތުގައި މި މައްސަލަ ރިޕޯޓުކޮށްފައިވަނީ މި މަހުގެ 15 ވަނަ ދުވަހުއެވެ.

ސޯޝަލް މީޑިއާގައި ހިއްސާކުރެވުނު މަޢުލޫމާތުތަކުން ދައްކާ ގޮތުގައި، ކުދިންގެ ނުރުހުމުގައި އެ ކުދިންގެ ގައިގައި އަތްލާން އުޅުނު މީހަކު ވަނީ ފުލުހުންނާ ހަވާލުކޮށްފައެވެ. އަދި އެ މީހާ ވަނީ މޫދުގައި އުޅުނު އެހެން ކުދިންނަށް ވެސް އެކަހެރި ތަންތަނަށް ދިއުމަށް ބުނެފައިވާ ކަމަށް ވެއެވެ.

ޖިންސީ ގޯނާ ކުރި ކަމަށް ތުހުމަތުވާ މީހާއަކީ ހުޅުމާލެ ފޭސް 1 ގެ މާރުކޭޓުގައި މަސް ވިއްކަން އުޅޭ މީހެއް ކަމަށް ބުނެ، އޭނާގެ ފޮޓޯ ވެސް ވަނީ ސޯޝަލް މީޑިއާގައި އާންމުކޮށްފައެވެ. ލިބިފައިވާ މަޢުލޫމާތުން ދައްކާ ގޮތުގައި އެ މީހާ ޖިންސީ ގޯނާކޮށްފައިވަނީ މޫދަށް އެރި އުޅުނު ކުޑަ ފިރިހެން ކުއްޖަކަށެވެ.

މި މައްސަލައާ ގުޅޭ އިތުރު ތަފްސީލެއް މިހާތަނަށް ފުލުހުން ހާމަކޮށްފައެއް ނުވެއެވެ. ނަމަވެސް ފުލުހުން ބުނެފައިވަނީ މި މައްސަލަ ތަޙުޤީޤު ކުރަމުންދާ ކަމަށެވެ.