މުލިއާގޭ ގަރާޖު ޒުވާނުންގެ މަރުކަޒަކަށް ބަދަލުކުރަން ރައީސް ނިންމަވައިފި

ލިލީމަގުގައި ހުންނަ މުލިއާގޭގެ ގަރާޖުގައި ޒުވާނުންގެ މަރުކަޒެއް ތަރައްގީ ކުރަން ރައީސް ޑރ. މުހައްމަދު މުއިއްޒު ނިންމަވައިފި އެވެ.

ރައީސް މުއިއްޒު މިފަދައިން ނިންމަވާފައި ވަނީ އިއްޔެ އޮތް ވަޒީރުންގެ މަޖިލީހަށް އިންފްރާސްޓްރަކްޗާ މިނިސްޓަރު، އަބްދުﷲ މުއްތަލިބު ހުށަހެޅުއްވި ކަރުދާހަކާ ގުޅޭގޮތުން މަޝްވަރާ ކުރެއްވުމަށްފަހު އެވެ.

ރައީސް އޮފީހުން ބުނާ ގޮތުގައި، މި މަރުކަޒަކީ ޒުވާނުން ބާރުވެރިކުރުވައި ހުނަރުވެރިކުރުވައި މުޖުތަމައުގެ އެކި ފަރާތްތަކާއެކު އިޖުތިމާއީ ގުޅުންތައް ބަދަހި ކުރާ ތަނަކަށް ވާނެއެވެ. މި މަރުކަޒުގައި އެކިކަހަލަ ބޫޓް ކޭމްޕުތަކާއި ސްކިލް އެކްސްޗޭންޖު ޕްރޮގުރާމުތަކުގެ އިތުރުން ވާޗުއަލް ޓްރެއިނިން އާއި ކޮމިއުނިޓީ އާޓް ވޯލް އަދި އެކި ބާވަތްތަކުގެ މަޝްވަރާ ބައްދަލުވުންތައް ބޭއްވުމަށް ވަނީ ރޭވިފައެވެ.

މި މަރުކަޒުގައި ރާއްޖެއަށް ހާއްސަ ކާބޯތަކެތި ވިއްކުމަށާއި ކުދި އަދި މެދުފަންތީގެ ކާބޯތަކެތި ވިއްކާ ވިޔަފާރިތަކުގެ އުފެއްދުންތައް އިޝްތިހާރުކޮށް ވިއްކޭނެ ކެފެޓޭރިއާއެއް ހިމެނުމަށް ވެސް ވަނީ ހުށަހެޅިފައެވެ. މި މަރުކަޒު ގާއިމު ކުރާއިރު، އެ ސަރަހައްދުގައި ހުންނަ ސްކޫލްތަކަށް އައިސްގޮސް އުޅޭ މީހުންނަށާއި އެ ސަރަހައްދުގެ ޓްރެފިކަށް ދަތި ނުވާނޭ ފަދަ ރަނގަޅު ޓްރެފިކް ޕްލޭނަކާ އެކު ކުރިއަށް ގެންދަން ވެސް ރައީސް ނިންމަވާފައިވާ ކަމަށް ރައީސް އޮފީހުން މައުލޫމާތު ދީފައިވެއެވެ.

މި މަޝްރޫއު ފެށުމާއެކު، ޒުވާނުންނަށް އިތުރު ފުރުސަތުތަކެއް ހުޅުވިގެންދާނެ ކަމަށް ބެލެވެއެވެ. އަދި މި މަރުކަޒަކީ ޒުވާނުންގެ ހުނަރާއި ގާބިލުކަން އިތުރުކޮށް، އެމީހުންގެ އުފެއްދުންތެރިކަން ކުރިއެރުވުމަށް މަގުފަހިވެގެންދާނެ ތަނަކަށް ވާނެ ކަމަށް އުއްމީދު ކުރެވެއެވެ.