އަންނަ އަހަރު ހުރިހާ ރަށެއްގައި ތަރައްޤީގެ މަޝްރޫޢުތައް ފެށޭނެ: ފިނޭންސް މިނިސްޓަރ

ރާއްޖޭގެ ހުރިހާ ރަށެއްގައިވެސް އަންނަ އަހަރު ތަރައްޤީގެ މަޝްރޫޢުތައް ކުރިއަށް ގެންދާނެ ކަމުގެ ޔަޤީންކަން ފިނޭންސް މިނިސްޓަރު މޫސާ ޒަމީރު ދެއްވައިފިއެވެ.

މިނިސްޓަރު މި ޔަޤީންކަން ދެއްވީ މިއަދު ބޭއްވުނު މަޖިލީހުގެ ޖަލްސާގައި އަންނަ އަހަރުގެ ބަޖެޓާ ގުޅޭގޮތުން ވާހަކަދައްކަވަމުންނެވެ.

މިނިސްޓަރު ޒަމީރު ވިދާޅުވި ގޮތުގައި، ކުރީގެ ބަޖެޓުތަކުގައި ޕީއެސްއައިޕީ ޕްރޮޖެކްޓްތަކަށް ކުޑަ އަދަދެއް ޖަހާފައި ހުރުމުން، އެ މަސައްކަތްތައް ކުރިއަށް ނުގެންދެވި ހުރި ކަން ފާހަގަކުރެވިފައިވެއެވެ. އަދި ބަޖެޓުގެ ޖާގަ ނެތުމާއި ފައިސާގެ ދަތިކަން ހުރުމުގެ ސަބަބުން ވެސް ބައެއް ޕްރޮޖެކްޓްތައް ކުރިއަށް ނުގެންދެވި ހުރި ކަމަށް އޭނާ ވިދާޅުވިއެވެ.

އަންނަ އަހަރުގެ ބަޖެޓުގައި ޕީއެސްއައިޕީ މަޝްރޫޢުތަކަށް 12.4 ބިލިއަން ރުފިޔާ ހިމަނާފައިވާއިރު، އަލަށް ފަށާ މަޝްރޫޢުތަކަށް ތިން ބިލިއަން ރުފިޔާ ކަނޑައަޅާފައިވާ ކަމަށް މިނިސްޓަރު ޒަމީރު ވިދާޅުވިއެވެ. އަދި މަޝްރޫޢުތައް ކުރިއަށް ގެންދާނީ ރައީސް ޑރ. މުޙައްމަދު މުޢިއްޒު އިސްކަންދެއްވާ ތަރުތީބުން ކަމަށް އޭނާ ފާހަގަކުރެއްވިއެވެ.

މިނިސްޓަރު ޒަމީރު އިތުރަށް ވިދާޅުވި ގޮތުގައި، މިހާރު ގެންގުޅޭ ލިސްޓުގައި އެއްވެސް ރަށެއް އުނިވެފައެއް ނޯންނާނެއެވެ. އަދި އަންނަ އަހަރު ތެރޭގައި ވެސް ހުރިހާ ރަށެއްގައި، ސިޓީތަކާއި މާލޭގައި ވެސް ޕްރޮޖެކްޓްތައް ފެށުމަށް ރޭވިފައިވާ ކަމަށް އޭނާ ވިދާޅުވިއެވެ.

ބަޖެޓުން ޖާގަ ލިބޭ މިންވަރަކުން ޕްރޮޖެކްޓުތަކާ ގުޅޭ ތަފްސީލްތައް އިޢުލާން ކުރައްވަމުން ގެންދަވާނެ ކަމަށް ވެސް މިނިސްޓަރު ޒަމީރު ވިދާޅުވިއެވެ. އަދި މި ބަޖެޓަކީ ދިވެހިރާއްޖޭގެ ތާރީޚުގައި އެއް އަހަރުދުވަހުގެ ތެރޭގައި ގެދޮރުވެރިކަމަށް ޚާއްޞަކޮށްގެން ސަރުކާރަކުން އެންމެ ބޮޑު ހޭދައެއް ކުރުމަށް ހުށަހަޅާފައިވާ ބަޖެޓެއް ކަމަށް އޭނާ ފާހަގަކުރެއްވިއެވެ.