އަންނަ އަހަރު 27،000 އަށް ވުރެ ގިނަ ހައުސިން ޔުނިޓްގެ މަސައްކަތް ފަށަނީ

ސަރުކާރުން އަންނަ އަހަރު މާލެ ސަރަހައްދުގައި 15،000 ހައުސިން ޔުނިޓާއި ރަށްރަށުގައި 12،000 ހައުސިން ޔުނިޓާ އެކު ޖުމްލަ 27،000 އަށް ވުރެ ގިނަ ހައުސިން ޔުނިޓްގެ މަސައްކަތް ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

މި ސަރުކާރަށް އެއް އަހަރު ފުރުން ފާހަގަކުރަން ބޭއްވި ރަސްމިއްޔާތުގައި ރައީސް މުއިއްޒު ވަނީ ސަރުކާރުން ކުރިއަށް ގެންދަން ނިންމާފައިވާ ތަރައްގީގެ މަޝްރޫއުތަކުގެ ތަފްސީލު ހިއްސާކުރައްވާފައެވެ. މީގެ ތެރޭގައި، އެމަނިކުފާނުގެ އެންމެ ބޮޑު އެއް ވައުދު ކަމަށްވާ ބޯހިޔާވަހިކަން ފޯރުކޮށްދިނުމަށް ރާވާފައިވާ މަޝްރޫއުތައް ހިމެނެއެވެ.

ރައީސް މުއިއްޒު ވިދާޅުވި ގޮތުގައި އަންނަ އަހަރަކީ ބޯހިޔާވަހިކަމުގެ އަހަރެވެ. މި ގޮތުން، ރައްޔިތުންގެ މަޖިލީހަށް ހުށަހަޅާފައިވާ އަންނަ އަހަރުގެ ބަޖެޓުގައި ގެދޮރު ބިނާކުރުމަށް 1.5 ބިލިއަން ރުފިޔާ އަދި ހައުސިން ލޯނަށް އެއް ބިލިއަން ރުފިޔާ ކަނޑައަޅާފައިވާ ކަމަށް އެމަނިކުފާނު ވިދާޅުވިއެވެ.

ރައީސް މުއިއްޒު އިތުރަށް ވިދާޅުވި ގޮތުގައި، މާލެ ސަރަހައްދުގައި އަޅާ 15،000 ހައުސިން ޔުނިޓުގެ އިތުރުން، ރަށްރަށުގައި ވެސް 12،940 ހައުސިން ޔުނިޓު އަޅަން ފަށާނެއެވެ. މީގެ ތެރޭގައި ކުޅުދުއްފުށި ސިޓީ، ތިނަދޫ، އައްޑޫ، އަދި ފުވައްމުލަކުގައި އަޅާ ފްލެޓުތައް ހިމެނޭ ކަމަށް އެމަނިކުފާނު ވިދާޅުވިއެވެ.

+އަދި ރައީސް މުއިއްޒު ވިދާޅުވި ގޮތުގައި، 41 ރަށެއްގައި އަލަށް ހައުސިން ޔުނިޓު އެޅުމުގެ މަސައްކަތް އަންނަ އަހަރު ފެށޭނެއެވެ. މި މަޝްރޫއުތަކަކީ އެމަނިކުފާނު އެކި ރަށްރަށަށް ވަޑައިގެން ވެފައިވާ ވައުދުތަކުގެ ތެރެއިން ހިމެނޭ މަޝްރޫއުތަކެއް ކަމަށް ވެސް ރައީސް މުއިއްޒު ފާހަގަކުރެއްވިއެވެ.