މަނީޕޫރުގައި ހަމަނުޖެހުން އިތުރުވެ އިންޓަނެޓް ކަނޑާލައި ކާފިއު އިއުލާންކޮށްފި

އިންޑިއާގެ މަނިޕޫރުގެ ހާލަތު ވަނީ ވަރަށް ބޮޑަށް ގޯސްވެފައި

އިންޑިޔާގެ މަނީޕޫރު ސްޓޭޓްގައި ހިނގަމުންދާ ހަމަނުޖެހުންތައް ކޮންޓްރޯލްކުރުމަށް ބައެއް ސަރަހައްދުތަކުގައި އިންޓަނެޓާއި މޮބައިލް ފޯނު ޚިދުމަތްތައް ކަނޑާލައި، ކަރފިއު އިއުލާންކޮށްފިއެވެ.

މި ފިޔަވަޅުތައް އަޅާފައިވަނީ މެއިޓީ ދަރިކޮޅުގެ ރައްޔިތުން ބައެއް ސިޔާސީ ވެރިންގެ ގެދޮރު ކައިރިއަށް އެއްވެ، އެ ސަރަހައްދުތައް ވަށައިލުމާ ގުޅިގެންނެވެ.

އެންމެ ފަހުގެ މި ހަމަނުޖެހުންތައް ފެށުނީ މެއިޓީ ދަރިކޮޅުގެ ތިން މީހަކު މަރާލުމާ ގުޅިގެންނެވެ. މި މަރުތަކާ ގުޅިގެން ކަންބޮޑުވުން ފާޅުކުރުމަށް ސަތޭކައެއްހާ މީހުން ވަނީ އިމްފާލްގައި ދިރިއުޅޭ ޤާނޫނު ހަދާ މަޖިލީހުގެ މެންބަރުންގެ ގެދޮރު ކައިރިއަށް އެއްވެފައެވެ.

ފުލުހުން ބުނެފައިވަނީ ޤާނޫނު ހަދާ މަޖިލީހުގެ ނުވަ މެންބަރެއްގެ ގެއަށް މުޒާހަރާގެ ބައިވެރިން ހަމަލާދީފައިވާ ކަމަށެވެ. އޭގެ ތެރެއިން ހަތަރު ގެއެއްގެ ތެރެއަށް ވަދެ، މުދަލާއި ތަކެއްޗަށް ގެއްލުންދީފައިވެއެވެ.

2023 ވަނަ އަހަރުގެ މޭ މަހުން ފެށިގެން މަނީޕޫރުގައި ހިނގަމުންދާ ހަމަނުޖެހުންތަކުގައި މިހާތަނަށް 250 އެއްހާ މީހުން މަރުވެފައިވާއިރު، 60,000 އަށްވުރެ ގިނަ މީހުންގެ ގެދޮރު ގެއްލިފައިވެއެވެ. މި ހަމަނުޖެހުންތައް ކޮންޓްރޯލްކުރުމަށް ސަރުކާރުން ވަނީ އިތުރު ސިފައިން ފޮނުވާފައެވެ.

އިންޑިއާ