ރާއްޖޭގެ މޫސުން ގޯސް، ދެކުނަށް ބޯކޮށް ވާރޭވެހުމުގެ ފުރުސަތު ބޮޑު: މެޓް އޮފީސް

ރާއްޖޭގެ ބޮޑު ސަރަހައްދަކަށް މޫސުން ގޯސްވެ، ބައެއް ރަށްތަކަށް ބޯކޮށް ވާރޭ ވެހޭނެކަމަށް  މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް)އިން ބުނެފިއެވެ.

މާލޭ ސަރަހައްދަށް ރޭއްސުރެ ދަނީ ވާރޭ ވެހެމުންނެވެ.

މެޓް އޮފީހުގެ މަޢުލޫމާތު ދައްކާ ގޮތުގައި ރާއްޖޭގެ އެކި ހިސާބުތަކަށް ވިއްސާރަ ކުރުމާއެކު ގުގުރާނެއެވެ. ޚާއްޞަކޮށް ދެކުނާއި މެދުރާއްޖެތެރޭގެ ބައެއް ރަށްތަކަށް ބޯކޮށް ވާރޭ ވެހުމުގެ ފުރުސަތު އޮތް ކަމަށް ވަނީ ފާހަގަކޮށްފައެވެ. ސެޓްލައިޓު ފޮޓޯތަކުން ފެންނަ ގޮތުގައި ރާއްޖޭގެ ދެކުނުގެ އަތޮޅުތަކުގެ މަތީގައި ވިއްސާރަ ވިލާ އުފެދިފައިވެއެވެ.

މިއަދު ހަވީރު 6 ޖެހުމާ ހަމައަށް މޫސުން ގޯސްކޮށް ދައްކާ ކަމަށް މެޓު އޮފީހުން ލަފާކޮށްފައިވެއެވެ. ދެކުނުގެ އަތޮޅުތަކަށް ވައިގެ ބާރުމިން ހުންނާނީ ގަޑިއަކު 5 މޭލާއި 15 މޭލުގައެވެ. އެހެން ހިސާބުތަކަށް 3 މީލާއި 13 މޭލުގައެވެ.

މޫސުމުގެ ނުރައްކަލަށް ސަމާލުވުމަށް އަންގައި، މެޓު އޮފީހުން ވަނީ މިއަދު މެންދުރު 1:30 އާ ހަމައަށް، ބ. އަތޮޅުން ފެށިގެން އދ. އަތޮޅަށް ހުދު އެލާޓު ނެރެފައެވެ. މި ހާލަތުގައި ކަނޑުދަތުރުފަތުރު ކުރާ ފަރާތްތަކަށް ސަމާލުވުމަށް އިރުޝާދު ދީފައިވެއެވެ.