ސިޔާސީ ޕާޓީތަކުގެ މެންބަރުންނާއި ޕާޓީތައް ޖޫރިމަނާކުރެވޭ ގާނޫނު ތަސްދީގުކުރައްވައިފި

ސިޔާސީ ޕާޓީތަކުގެ މެންބަރުންނާއި ޕާޓީތައް ޖޫރިމަނާކުރެވޭ ގާނޫނު ރައީސުލްޖުމުހޫރިއްޔާ މުހައްމަދު މުއިއްޒު މިއަދު ތަސްދީގުކުރައްވައިފިއެވެ.

މިއަދު މި ތަސްދީގު ކުރެވުނު ސިޔާސީ ޕާޓީގެ ގާނޫނަށް ގެނެވުނު އިސްލާހުގެ ދަށުން، ގާނޫނާ ޚިލާފުވާ ޕާޓީތަކުގެ މެންބަރުންނާއި ޕާޓީތައް ބޮޑެތި އަދަދުތަކުން ޖޫރިމަނާކުރެވޭގޮތަށް ވަނީ ހަމަޖައްސާފައެވެ.

މި އިސްލާހުގެ ދަށުން، ގާނޫނާ ޚިލާފުވާ މެންބަރުން 30،000 ރުފިޔާއާއި 75،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ. އަދި އެ މެންބަރަކު ނިސްބަތްވާ ޕާޓީ 100،000 ރުފިޔާއިން ޖޫރިމަނާކުރެވޭނެއެވެ.

މީގެ އިތުރުން، ސިޔާސީ ޕާޓީއެއް އުވާލެވޭ ހާލަތުގައި އެ ޕާޓީއެއްގެ ނަމާއި، ނިޝާނާއި، ސިއްކައާއި، ކުލަ ފަދަ ތަކެތި އަލުން ބޭނުންކުރެވޭނީ ފަސް އަހަރު ފަހުން ކަމަށް މި އިސްލާހުގައި ބަޔާންކޮށްފައިވެއެވެ.

ސިޔާސީ ޕާޓީތައް ހިންގުމަށް ދައުލަތުގެ ބަޖެޓުން ދެވޭ ފައިސާގެ މިންވަރު ވެސް މި އިސްލާހުގައި ކަނޑައަޅާފައިވެއެވެ. އެގޮތުން، އަހަރީ ބަޖެޓުގައި އެ އަހަރަކަށް ލަފާކުރާ އާމްދަނީގެ 0.1 އިންސައްތައާއި 0.2 އިންސައްތައާ ދެމެދުގެ އަދަދެއް ޕާޓީތަކަށް ދޫކުރެވޭނެއެވެ.