"ދާލަން" އެކްސްޕޯގައި އެމްއޭސީއެލްގެ ސްޓޯލަށް 3،000 އަށްވުރެ ގިނަ މީހުން ޒިޔާރަތްކޮށްފި

އެމްއޭސީއެލްގެ ސްޓޯލަށް މިނިސްޓަރ މާރިޔާ ޒިޔާރަތް ކުރެއްވުން / ފޮޓޯ:އެމްއޭސީއެލް

މިނިސްޓްރީ އޮފް ހަޔާ އެޑިއުކޭޝަން، ލޭބާ އެންޑް ސްކިލްސް ޑިވެލޮޕްމަންޓުން އިންތިޒާމްކޮށްގެން ބޭއްވި "ދާލަން" ކެރިއާ އެކްސްޕޯގައި އެމްއޭސީއެލްގެ ސްޓޯލަށް 3،377 މީހުން ޒިޔާރަތްކޮށްފައިވާ ކަމަށް އެ ކުންފުނިން ބުނެފިއެވެ.

މި މަހުގެ 15 އިން 16އަށް ކުރިއަށް ގެންދިޔަ މި އެކްސްޕޯގައި އެމްއޭސީއެލްގެ ސްޓޯލަށް ޒިޔާރަތްކުރި މީހުންގެ ތެރެއިން 600 މީހުން ވަޒީފާއަށް އެދި ފޯމު ފުރިހަމަކޮށްފައިވާ އިރު، 103 މީހަކު އިންޓާންޝިޕް ފުރުސަތުގައި ބައިވެރިވުމަށް އެދި ފޯމު ފުރިހަމަކޮށްފައިވެއެވެ.

އެމްއޭސީއެލްގެ 20 ޑިޕާޓްމަންޓަކުން ބައިވެރިވި މި އެކްސްޕޯގައި، ވެލާނާ އިންޓަނޭޝަނަލް އެއާޕޯޓުގެ އޮޕަރޭޝަންސް ކުރިއަށްދާ ގޮތާއި އެ ކުންފުނިން ކުރާ މުހިއްމު މަސައްކަތްތައް ދައްކާލައި، އިޤްތިޞާދާއި ކުރިއަރަމުން އަންނަ އޭވިއޭޝަން ދާއިރާގައި ޒުވާނުންނަށް ހުޅުވިފައިވާ ވަޒީފާގެ ފުރުސަތުތަކުގެ މަޢުލޫމާތު ދީފައިވެއެވެ.

މި ފެއާގައި އެމްއޭސީއެލްގެ ވަޒީފާއަށް ކުރިމަތިލީ މީހުންގެ ތެރެއިން ހަތަރު މީހަކަށް ވަޒީފާގެ ލިޔުން ހަވާލުކޮށްފައިވާ އިރު، ބާކީ ހުރި އެޕްލިކޭޝަންތައް ޕްރޮސެސްކުރުމަށްފަހު އިތުރު ފަރާތްތަކަށް ވަޒީފާގެ ފުރުސަތު ލިބޭނެ ކަމަށް އެމްއޭސީއެލްއިން ބުނެފައިވެއެވެ.

ހުޅުމާލެ ސެންޓްރަލް ޕާކުގައި ބޭއްވުނު މި އެކްސްޕޯއަކީ ވަޒީފާ ހޯދާ ފަރާތްތަކާއި ވަޒީފާ ދޭ ފަރާތްތައް ގުޅުވައިދިނުމުގެ ގޮތުން ބޭއްވުނު ހަރަކާތެއް ކަމަށްވާއިރު، މި އެކްސްޕޯގައި އެމްއޭސީއެލްގެ ސްޓޯލަށް ލިބުނު ތަރުހީބަކީ އެ ކުންފުންޏަށް ލިބުނު ބޮޑު ކާމިޔާބީއެއް ކަމުގައިވެސް އެ ކުންފިން ދެކެއެވެ.

އެމްއޭސީއެލް