ނޫސްވެރިންގެ ކަންބޮޑުވުންތަކަށް ހައްލު ހޯދައިދޭނެކަމުގެ ޔަގީންކަން އޭޖީ ދެއްވައިފި

ނޫސްވެރިންގެ ކަންބޮޑުވުންތަކަށް ހައްލު ހޯދައިދެއްވާނެ ކަމުގެ ޔަގީންކަން ބަންޑާރަ ނައިބު އަޙުމަދު އުޝާމް ވަނީ ދެއްވައިފިއެވެ.

މި ޔަގީންކަން ދެއްވީ 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު' ގެ ނަމުގައި ރައްޔިތުންގެ މަޖިލީހަށް ހުށަހަޅާފައިވާ ބިލާ ގުޅިގެން ނޫސްވެރިންގެ މެދުގައި އުފެދިފައިވާ ކަންބޮޑުވުންތަކާ ގުޅޭގޮތުން ވާހަކަފުޅު ދައްކަވަމުންނެވެ.

މި ބިލުގައި ނޫސްވެރިކަން ކުރުން ހަނިވާ ގޮތަށް އޮތުމުން، މޯލްޑިވްސް މީޑިއާ ކައުންސިލް (އެމްއެމްސީ) އާއި ޖާނަލިސްޓްސް އެސޯސިއޭޝަން ގުޅިގެން 'ހަތަރެއްގެ ހައްގުގައި' ނަމުގައި ކެންޕޭނެއް ފަށާފައިވެއެވެ. މި ކެންޕޭނުގައި އިސްކޮށް ހަރަކާތްތެރިވާ ނޫސްވެރިން ވަނީ އޭޖީ އުޝާމްއާއި ޔޫތު މިނިސްޓަރު އިބްރާހީމް ވަހީދުގެ އިތުރުން ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހީމް ޚަލީލާ ބައްދަލުކޮށްފައެވެ.

އޭޖީ އޮފީހުން މަޢުލޫމާތު ދެއްވާފައިވާ ގޮތުގައި، މި ބައްދަލުވުމުގައި އޭޖީ އުޝާމް ވަނީ ނޫސްވެރިންގެ ޝަކުވާތަކަށް އަޑުއަހައިވަޑައިގެން، އެ ކަންބޮޑުވުންތައް ހައްލުކޮށްދެއްވާނެ ކަމުގެ ޔަގީންކަން ދެއްވާފައެވެ. އަދި މި ބައްދަލުވުމަށްފަހު ފަހު ބޭއްވުނު އިތުރު ބައްދަލުވުމެއްގައި އެމްޖޭއޭގެ ސެކްރެޓަރީ ޖެނެރަލް އަހުމަދު ނާއިފް ވިދާޅުވެފައިވަނީ، އެމްއެމްސީއާއި ބްރޯޑްކޮމް އުވާލައި، މީޑިއާ ރެގިއުލޭޓު ނުކުރާ ގޮތް ހެދުމަކީ އޭޖީގެ ވިސްނުންފުޅެއްކަން ހިއްސާކުރެއްވި ކަމަށެވެ.

މި މައްސަލައިގައި ޖަމިއްޔާތަކުން ވަނީ މިހާރު ހުށަހަޅާފައި އޮތް ބިލު ބޭރުކޮށް، މީޑިއާތަކާ މަޝްވަރާކޮށްގެން އާ ބިލެއް ޑްރާފްޓު ކުރުމަށް ގޮވާލާފައެވެ. މި ކަންބޮޑުވުންތަކާ ގުޅިގެން ސަރުކާރުގެ އިސް ފަރާތްތަކުން ދެއްވާފައިވާ ޔަގީންކަމަކީ ނޫސްވެރިންނަށް ލިބިގެންދިޔަ ހިތްވަރެއް ކަމުގައި ބެލެވެއެވެ.