އެއާ އެމްބިއުލާންސްގެ ޚިދުމަތުން 500 އަށްވުރެ ގިނަ ބަލިމީހުން އުފުލައިފި

އެއާރ އެމްބިއުލާންސްގެ ސަބަބުން ރައްޔިތުންނަށް އެތައް ފަސޭހައެއްވޭ

ހެލްތް މިނިސްޓްރީން މިއަދު ހާމަކުރި މަޢުލޫމާތުގައިވާ ގޮތުން، އެއާ އެމްބިއުލާންސްގެ ޚިދުމަތް ފެށި ފަހުން މިހާތަނަށް 437 ދަތުރުކޮށް، 540 ބަލިމީހުން ވަނީ އުފުލާފައެވެ.

މި ޚިދުމަތް ރާއްޖޭގައި ފުރަތަމަ ފަހަރަށް ފެށީ މި އަހަރުގެ މާޗު މަހުގެ އެއްވަނަ ދުވަހުއެވެ.

އެއާ އެމްބިއުލާންސް ތަޢާރަފުކޮށް ސިއްޙީ ކުއްލި ހާލަތްތަކުގައި ބަލިމީހުން އުފުލުމުގެ ޚިދުމަތް ފެށުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. މި ޚިދުމަތް އޮޕަރޭޓްކުރަމުން އަންނަނީ ގައުމީ އެއާލައިން މޯލްޑިވިއަނުންނެވެ.

މި ސަރުކާރުން އެއާ އެމްބިއުލަންސްގެ ޚިދުމަތް ފެށުމުގެ ކުރިން، ކުއްލި ހާލަތުގައި ބަލިމީހުން އަތޮޅުތެރެއިން މާލެއަށް އުފުލުމަށް ބޭނުންކުރަމުންދިޔައީ އާންމު ދަތުރުތަކަށް ވެސް ބޭނުންކުރާ މޯލްޑިވިއަންގެ ޝެޑިއުލް ފްލައިޓުތަކެވެ. އެކަމުގެ ސަބަބުން ބަލިމީހުން މާލެ ނުގެނެވި ލަސްވުން ފަދަ ގިނަ މައްސަލަތައް ކުރިމަތިވެފައިވެއެވެ.

އެކަން ހައްލުކުރުމަށް ތަޢާރަފުކުރި އެއާ އެމްބިއުލާންސްގެ ޚިދުމަތް ދިނުމުގައި ބޭނުންކުރާ ޑޭޝް މަތިންދާބޯޓުގައި ވަނީ ބަލިމީހުންނަށް ކުއްލި ފަރުވާ ދިނުމަށް ބޭނުންވާ ހުރިހާ އާލާތްތަކެއް ވެސް ހަރުކޮށްފައެވެ. މި ޚިދުމަތުގެ ސަބަބުން ކުއްލި ހާލަތްތަކުގައި ބަލިމީހުންނަށް އަވަސް ފަރުވާ ލިބުމުގެ ފުރުސަތު އިތުރުވެފައިވެއެވެ.

މޯލްޑިވިއަން އެއާރލައިންސް ސިއްޙަތު