ނެދަލޭންޑްސް ހަންގޭރީ ބަލިކޮށް ކުއާޓަރ ފައިނަލަށް ދަތުރުކޮށްފި

ޔޫއެފާ ނޭޝަންސް ލީގުގައި ނެދަލޭންޑްސް އިން ހަންގޭރީ އާ ދެކޮޅަށް ކުޅުނު މެޗު 4-0 ގެ ނަތީޖާއަކުން ކާމިޔާބުކޮށް، މުބާރާތުގެ ކުއާޓަރ ފައިނަލުގެ ޖާގައެއް ކަށަވަރުކޮށްފިއެވެ.

ނެދަލޭންޑްސްގެ ޔޯހަން ކްރައިފް އެރީނާގައި ކުޅެވުނު މި މެޗު ފެށިގެން ކުރިއަށްދަނިކޮށް، ހަންގޭރީގެ އެސިސްޓެންޓް ކޯޗު އެޑަމް ސަލާއީ ކުއްލިގޮތަކަށް ދަނޑުމައްޗަށް ވެއްޓުމާ ގުޅިގެން މެޑިކަލް އެމަޖެންސީއެއްގެ ގޮތުގައި މެޗުގެ ކުޅުން ވަގުތީގޮތުން ހުއްޓާލަން ޖެހުނެވެ. ނަމަވެސް ސަލާއީގެ ހާލަތު މިހާރު ރަނގަޅު ކަމަށް ހަންގޭރީގެ ފުޓްބޯޅަ ފެޑަރޭޝަނުން ބުނެފައިވެއެވެ.

މެޗުގައި ނެދަލޭންޑްސްގެ ފަރާތުން ވައުޓް ވެގްހޮސްޓް، ކޯޑީ ގެކްޕޯ، ޑެންޒެލް ޑަމްފްރައިސް އަދި ޓިއުން ކޫޕްމެއިނާސް ވަނީ ލަނޑު ޖަހާފައެވެ. މި މޮޅުވުމާއެކު ނެދަލޭންޑްސް އަށް ވަނީ ފަސް މެޗުން 8 ޕޮއިންޓާއެކު ދެވަނަ ޓީމުގެ ގޮތުގައި ކުއާޓަރ ފައިނަލުގެ ޖާގައެއް ލިބިފައެވެ.

ހަންގޭރީ އަށް ފަސް މެޗުން ފަސް ޕޮއިންޓް ލިބިފައިވާއިރު، އެ ޓީމު އޮތީ މައިނަސް ހަތް ގޯލުގެ ތަފާތަކާއެކުގައެވެ. ގްރޫޕުގެ ފުލުގައި އޮތް ބޮސްނިއާ އަށް ފަސް މެޗުން ލިބިފައިވަނީ އެންމެ ޕޮއިންޓެކެވެ.