ހުޅުމާލެ ހޮސްޕިޓަލް ޓަރޝަރީ ފެންވަރަށް ތަރައްޤީކޮށް ރަސްމީކޮށް ހުޅުވައިފި

ގިނަ ޚިދުމަތްތަކެއް އަލަށް ޤާއިމްކޮށް، ހުޅުމާލެ ހޮސްޕިޓަލް ޓަރޝަރީ ފެންވަރަށް ތަރައްޤީކޮށް ރަސްމީކޮށް ހުޅުވައިފިއެވެ.

މި ހޮސްޕިޓަލް ރަސްމީކޮށް ހުޅުއްވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.

ހުޅުވުމުގެ ރަސްމިއްޔާތުގައި ވާހަކަދެއްކެވި ދަރުމަވަންތަ ހޮސްޕިޓަލްގެ ސީއީއޯ އިބްރާހިމް ޢަބްދުއްރައްޒާޤު ޙަލީމް ވިދާޅުވީ ރައީސް މުޢިއްޒުގެ އަމާޒަކީ ރާއްޖޭގެ ޞިއްޙީ ދާއިރާއަށް އައު ޚިދުމަތްތައް ތަޢާރަފްކޮށް، މިހާރު ދެމުންދާ ޚިދުމަތްތައް ކުރިއަރުވައި، މިދާއިރާއަށް އިންޤިލާބީ ބަދަލެއް ގެނައުން ކަމަށެވެ.

ޓަރޝަރީ ފެންވަރަށް ހުޅުމާލޭ ހޮސްޕިޓަލް ތަރައްޤީކުރުމަށް ގިނަ ޚިދުމަތްތަކެއް ޤާއިމްކޮށްފައިވެއެވެ. އޭގެ ތެރޭގައި ޒަމާނީ ވަޞީލަތްތަކާއެކު 4 އޮޕަރޭޓިން ރޫމް ހިމެނޭ އޮޕަރޭޝަން ތިއޭޓަރ ކޮމްޕްލެކްސެއް، 10 އެނދުގެ އިންޓެންސިވް ކެއަރ ޔުނިޓު (އައިސީޔޫ)، އަދި 14 އެނދުގެ ނިއޮނޭޓަލް އިންޓެންސިވް ކެއަރ ޔުނިޓެއް ހިމެނެއެވެ.

މީގެ އިތުރުން، ހޮސްޕިޓަލުގައި ސެންޓްރަލް ސްޓްރެއިލް ސަރވިސް ޑިޕާޓްމަންޓެއްވެސް ޤާއިމްކޮށްފައިވެއެވެ. މި ޑިޕާޓްމަންޓަކީ ޚިދުމަތް ދިނުމުގައި ބޭނުންކުރާ ޞިއްޙީ އާލާތްތައް ސާފުކުރުމުގެ މަސައްކަތްކުރާ ތަނެވެ. ޒަމާނީ ފެންވަރުގެ މެޝިނަރީއާއެކު މި ޑިޕާޓްމަންޓް ޤާއިމްކުރުމުން މެޑިކަލް އާލާތްތަކުގެ ރައްކާތެރިކަން އިތުރަށް ކަށަވަރުކުރެވޭނެއެވެ.

މި ތަރައްޤީތަކާއެކު، ހުޅުމާލޭ ހޮސްޕިޓަލުން ދެވޭ ޚިދުމަތްތަކުގެ ފެންވަރު މަތިވެ، ހުޅުމާލޭގެ ރައްޔިތުންނަށް ފަސޭހަކަމާއެކު ޓަރޝަރީ ފެންވަރުގެ ޞިއްޙީ ޚިދުމަތްތައް ލިބިގެންދާނެކަމަށް ބެލެވެއެވެ.