އިމާމުންނާއި މުދިމުންގެ ހެދުން އެޅުމާއި ގުޅޭ އައު އުސޫލު އާއްމުކޮށްފި

"އިމާމުންނާއި މުދިމުންގެ ސުލޫކީ މިންގަނޑު ބަހައްޓަންވީ އުސޫލު" ގެ ނަމުގައި އައު އުސޫލެއް އެކުލަވާލައި އިސްލާމިކް މިނިސްޓްރީން ގެޒެޓުކޮށްފިއެވެ.

މި އުސޫލުގައި އިމާމުންނާއި މުދިމުންގެ އަންނައުނު، އަޅުކަމުގެ ކަންކަން އަދި އަމިއްލަ ކަންތައްތައް ބަހައްޓަންވީ ގޮތް ކަނޑައަޅާފައިވެއެވެ.

އުސޫލުގައި ބަޔާންކޮށްފައިވާ ގޮތުން، އިމާމުވެ ނަމާދުކުރާއިރު ޖީންސާއި ޓީޝާޓު ފަދަ ތަކެތި އަދި ގަޔަށް ބާރު ހެދުން ލައިގެން ނަމާދުކުރުން މަނާކޮށްފައިވެއެވެ. އަދި ބަންގި ގޮވުމާއި އިމާމުވެ ނަމާދުކުރާއިރު ބޮލުގައި އެއްޗެއް އެޅުމަށް އިސްކަންދޭން ޖެހޭނެކަމަށް ބަޔާންކޮށްފައިވެއެވެ.

މީގެ އިތުރުން، އުސޫލުގައި އިމާމުންނާއި މުދިމުންގެ އަޚްލާޤީ މިންގަނޑުތަކާ ގުޅޭ ކަންކަންވެސް ހިމަނާފައިވެއެވެ. އޭގެ ތެރޭގައި އިސްލާމްދީނުގެ މެދުމިންކަމުގެ އުސޫލުތަކުގައި ހިފެހެއްޓުމާއި، ހައްދުފަހަނައަޅާ ދިއުމުގެ ފިކުރުތަކުން ދުރުހެލިވުން، އަދި ދީނީގޮތުން ބައިބައިވުން އުފެދޭ ގޮތްތަކަށް އަމަލުނުކުރުން ހިމެނެއެވެ.

އުސޫލުގައި އަދި ބަޔާންކޮށްފައިވަނީ މިނިސްޓްރީގެ ހުއްދަނެތި މިސްކިތުގައި އެއްވެސް ދީނީ ޕްރޮގްރާމެއް ނުހިންގުމަށާއި، އެފަދަ ޕްރޮގްރާމެއްގައި ބައިވެރިނުވުމަށެވެ. އަދި މިސްކިތަށް ޖަމާއަތުގެ ނަމާދަށް ހާޒިރުވާ މީހުންނަށް ނަމޫނާއަކަށް ވާ ފަދަ ގޮތަކަށް ސާފުތާހިރުވެ، ރީތިބަހުން ވާހަކަދައްކައި، ރިވެތި އަޚްލާޤެއްގެ ވެރިމީހަކަށް ވާންޖެހޭނެ ކަމަށްވެސް ބަޔާންކޮށްފައިވެއެވެ.

މި އުސޫލާ ޚިލާފުވެއްޖެނަމަ، އެކަމެއްގެ ކުޑަބޮޑުމިނަށް ބެލުމަށްފަހު ދިވެހި ސިވިލް ސާވިސްގެ ގަވާއިދުގެ ދަށުން ފިޔަވަޅު އަޅާނެކަމަށް އުސޫލުގައި ބަޔާންކޮށްފައިވެއެވެ.