ޓްރަމްޕްގެ ވައިޓް ހައުސްގެ ޕްރެސް ސެކްރެޓަރީއަކަށް ޒުވާން ކެރޮލައިން އައްޔަންކުރައްވައިފި
ވައިޓް ހައުސްގެ އައު ޕްރެސް ސެކްރެޓަރީ ޒުވާން ކެރޮލައިން ލީހީ
އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް އެމަނިކުފާނުގެ ވައިޓް ހައުސްގެ އައު ޕްރެސް ސެކްރެޓަރީއަކަށް 27 އަހަރުގެ ޒުވާން ކެރޮލައިން ލީހީ އައްޔަން ކުރައްވައިފިއެވެ.
މިއީ މިހާތަނަށް އެ މަޤާމަށް އައްޔަންކުރެވުނު އެންމެ ޒުވާން ފަރާތެވެ.
ކެރޮލައިންއަކީ މީގެ ކުރިން ޓްރަމްޕްގެ ފުރަތަމަ ދައުރުގައި އެސިސްޓެންޓް ޕްރެސް ސެކްރެޓަރީގެ މަޤާމު އަދާކުރައްވާފައިވާ ބޭފުޅެކެވެ. ޓްރަމްޕް ވަނީ ކެރޮލައިންއަށް ވަރަށް ބޮޑަށް ތައުރީފުކުރައްވައި، އޭނާއަކީ ތޫނުފިލި، ބުރަކޮށް މަސައްކަތްކުރާ އަދި އިތުބާރުކުރެވޭ މީހެއްގެ ގޮތުގައި ސިފަކުރައްވާފައެވެ.
ނިއު ހެމްޝަޔާއަށް އުފަން ކެރޮލައިންއަކީ ސެއިންޓް އެންސެލްމް ކޮލެޖުން ޕޮލިޓިކްސް އެންޑް ކޮމިއުނިކޭޝަންސްގެ ދާއިރާއިން ބެޗްލާސް ޑިގްރީ ހާސިލްކުރައްވާފައިވާ ބޭފުޅެކެވެ. އޭނާ ފުރަތަމަ މަސައްކަތްކުރެއްވީ ޓްރަމްޕްގެ ދައުރުގައި ވައިޓް ހައުސްގައި އިންޓާންއެއްގެ ގޮތުގައެވެ.
ސިޔާސީ ދާއިރާގައި މަސައްކަތްކުރުމުގެ ކުރިން ކެރޮލައިން ވަނީ މީޑިއާގެ އެކި ދާއިރާތަކުގައި މަސައްކަތްކުރައްވާފައެވެ. އޭގެ ތެރޭގައި ޑަބްލިއުއެމްޔޫއާރު-ޓީވީގެ ޕްރޮޑިއުސަރެއްގެ މަޤާމާއި، ފޮކްސް ނިއުސް މީޑިއާގެ އިދާރީ އެހީތެރިއެއްގެ މަޤާމު އަދި ނިއު ހެމްޝަޔާ ކްރޮނިކަލްގެ އެސޯސިއޭޓް ޕްރޮޑިއުސަރެއްގެ މަޤާމު ހިމެނެއެވެ.
ކޮމެންޓް