ޕޮގްބާ އާއި ޔުވެންޓަސް އާ ދެމެދު އޮތް އެއްބަސްވުން އުވާލައިފި

މަނާ ބޭސް ބޭނުންކުރި މައްސަލައިގައި ސަސްޕެންޝަނުގައި ހުރި ފްރާންސްގެ ތަރި، ޕައުލް ޕޮގްބާ، ކުޅުމަށް އެނބުރި އައުމަށް ތައްޔާރުވަމުން އައި ނަމަވެސް، އޭނާ އާއި ޔުވެންޓަސްއާ ދެމެދު ހަދާފައިވާ އެއްބަސްވުން އުވާލައިފި އެވެ.

މަނާބޭހަށް ޕޮޒިޓިވްވުމުގެ މައްސަލައެއްގައި 31 އަހަރުގެ ޕޮގްބާ، އެންމެ ފުރަތަމަ ހަތަރު އަހަރަށް ސަސްޕެންޑްކުރެވުނެވެ. ނަމަވެސް ފަހުން، އިންޓަނޭޝަނަލް ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އިން ވަނީ އޭނާގެ ސަސްޕެންޝަން 18 މަހަށް ކުޑަކޮށްފައެވެ. މި ނިންމުމާ ގުޅިގެން، ޕޮގްބާއަށް ޖެނުއަރީގައި ޓީމު ޕްރެކްޓިސްތަކަށް ނުކުމެ، އަންނަ އަހަރުގެ މާޗް މަހު ރަސްމީކޮށް ކުޅުމުގެ ތެރެއަށް އެނބުރި އާދެވޭނެއެވެ.

ފުޓްބޯޅަ ކެރިއަރު ކުރިއަށްގެންދާނެ ގޮތާ ބެހޭގޮތުން، ޕޮގްބާ މީޑިއާތަކަށް ދިން އިންޓަވިއުއެއްގައި ޔުވެންޓަސްގައި މަޑުކުރަން ބޭނުންވާ ކަމަށް ބުނެފައިވީ ނަމަވެސް، އެ ކްލަބާ އެކު މަޝްވަރާކޮށް މިހާރު ވަނީ އެއްބަސްވުން އުވާލައިފައެވެ. ޔުވެންޓަސް އިން ބުނީ މިއީ މި ވަގުތަށް އެންމެ ރަނގަޅު ނިންމުން ކަމަށާއި ޕޮގްބާ އަށް އަބަދުވެސް ކާމިޔާބަށް އެދޭ ކަމަށެވެ.

ޕޮގްބާ ވަނީ، އަލުން ޔުވެންޓަސް އަށް ކުޅެލުމުގެ ފުރުސަތު ލިބުނީތީ އުފާކުރާ ކަމަށާއި ސަސްޕެންޝަނުގައި ހުންނަން ޖެހުނު އެންމެ އުނދަގޫ ވަގުތުގައި ޔުވެންޓަސް އިން ދިން އެއްބާރުލުން އަބަދުވެސް ހަނދާނުގައި ހުންނާނެ ކަމަށް ބުނެފައެވެ.

ފްރާންސްގެ ގައުމީ ޓީމާ އެކު 2018 ވަނަ އަހަރުގެ ވޯލްޑް ކަޕް ކާމިޔާބުކުރި ޕޮގްބާ މެންޗެސްޓާ ޔުނައިޓެޑް އިން ދެ ވަނަ ފަހަރަށް ޔުވެންޓަސް އަށް ބަދަލުވީ 2022 ވަނަ އަހަރުއެވެ. އޭރު އޭނާ ވަނީ ޔުވެންޓަސްއާ އެކު ހަތަރު އަހަރުގެ ކޮންޓްރެކްޓެއްގައި ސޮއިކޮށްފައެވެ. ނަމަވެސް މިހާރު މި ދެ ފަރާތުގެ ދެމެދުގައި އޮތް އެއްބަސްވުން ވަނީ އުވާލާފައެވެ.