ރާއްޖޭގައި ކުއްލި ހާލަތްތަކަށް 911 ނަންބަރު ތަޢާރަފުކޮށްފި

ހޯމް މިނިސްޓަރު އަލީ އިހުސާން

ދިމާވާ ކުއްލި ހާލަތްތަކުގައި އެހީތެރިކަމާއި ރައްކާތެރިކަމަށް އެދި ގުޅަން "ޝޯޓްކޯޑް ލައިން" 911 ރާއްޖޭގައި ރޭ ފެށިގެން ބޭނުންކުރަން ފަށައިފިއެވެ.

މި ޚިދުމަތް ތަޢާރަފުކުރުމަށް ބޭއްވި ރަސްމިއްޔާތުގައި ހޯމް މިނިސްޓަރު އަލީ އިހުސާން ވިދާޅުވީ މިއީ ރާއްޖެ ރަން އަކުރުން ފަވާލެވޭނެ ރެއެއް ކަމަށެވެ.

މި ޚިދުމަތް ގާއިމުކޮށްފައިވަނީ ޕޮލިސް މުއައްސަސާގައެވެ. 911 އަކީ ޕޮލިހަށް ކަމެއް ރިޕޯޓު ކުރުމާއި، އެމްބިއުލާންސްގެ ޚިދުމަތާއި، ކޯސްޓްގާޑާއި ފަޔަރ އެންޑް ރެސްކިޔު ޚިދުމަތް ވެސް ލިބޭނެ ނަންބަރެކެވެ.

މިނިސްޓަރު އިހުސާން ވިދާޅުވި ގޮތުގައި 911 ނަންބަރު އިޚްތިޔާރުކުރީ އެއީ އެންމެ ގިނަ މީހުންނަށް، އަދި ކުޑަކުދިންނަށް ވެސް އެނގޭ ނަންބަރަކަށް ވާތީއެވެ. އަދި މީޑިއާގެ ޒަރީއާއިން ވެސް އާންމުކޮށް ފެންނަ ނަންބަރަކަށްވާތީ ގިނަ ރައްޔިތުންނަށް ހަނދާނުގައި ބަހައްޓަން ފަސޭހަވާނެ ކަމަށް ވިދާޅުވިއެވެ.

މި ޚިދުމަތުގެ ފެންވަރު ދުވަހެއް ދުވަހަކަށް ރަނގަޅުވަމުންދާނެ ކަމަށް މިނިސްޓަރު ވިދާޅުވިއެވެ. އޭގެ ތެރޭގައި ކޮމިޔުނިކޭޝަން ސިސްޓަމްތައް އެޑްވާންސްކުރުމާއި، ޖީއައިއެސް މެޕް ކުރެވޭނެ ނިޒާމަކަށް ބަދަލުކުރުމާއި، ރެސްޕޮންސް ޓައިމް އަވަސް ކުރުން ހިމެނެއެވެ.

މިނިސްޓަރު އިހުސާން ވަނީ އާންމުންނާ ގުޅިފައިވާ މިފަދަ މުހިންމު ޚިދުމަތެއް ނަހަމަ ގޮތުގައި ބޭނުން ނުކުރުމަށް ވެސް އިލްތިމާސް ކުރައްވާފައެވެ. ކުއްލިކުއްލި ހާލަތްތަކުގައި ގުޅުމަށް ގިނަ ގައުމުތަކުގައި ބޭނުންކުރާ އިމަޖެންސީ ނަންބަރަކީ ވެސް 911 އެވެ.

މިނިސްޓަރ އިޙްސާން