ބަޖެޓް ފައިނޭންސިންގ ނުލިބިއްޖެނަމަ ރިޒާވަށް އަސަރުކުރާނެ: ގަވަރުނަރު

ރާއްޖޭގެ އަންނަ އަހަރުގެ ބަޖެޓް ފައިނޭންސިންގ އަށް ބޭނުންވާ 766 މިލިއަން ޑޮލަރު (12 ބިލިއަން ރުފިޔާ) ނުލިބިއްޖެނަމަ، ޤައުމުގެ ރިޒާވަށް ނޭދެވޭ އަސަރެއް ކުރާނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.

ރައްޔިތުންގެ މަޖިލީހުގެ ބަޖެޓް ކޮމިޓީގައި ވާހަކަފުޅު ދައްކަވަމުން ގަވަރުނަރު މުނައްވަރު ވިދާޅުވީ، މި ހާލަތުގައި މާލީ ރިފޯމްތަކުގެ މަސައްކަތް ވަރަށް މުހިންމު ކަމަށެވެ. އޭނާ ވިދާޅުވީ ސަރުކާރުން ރާވާފައިވާ ގޮތަށް ރިފޯމްތައް ކުރިއަށް ގެންގޮސް، ރިޒާވް އިތުރަށް ބޮޑުކުރެވޭނެ ގޮތެއް ހޯދަން ޖެހޭ ކަމަށެވެ.

ގަވަރުނަރު އިތުރަށް ފާހަގަކުރެއްވި ގޮތުގައި، ރާއްޖޭގެ ކްރެޑިޓް ރޭޓިންގ ދަށްވެއްޖެނަމަ، ބޭރުން ފައިނޭންސިންގ ހޯދުމަށް ބޮޑެތި ދަތިތަކެއް ދިމާވާނެއެވެ. އަދި ރިޒާވް އިތުރު ނުކުރެވޭނަމަ ރޭޓިންގ ކުންފުނިތަކުން ރާއްޖެއަށް ރަނގަޅު ރޭޓިންގއެއް ނުދޭނެ ކަމަށް ވެސް އޭނާ ވިދާޅުވިއެވެ.

އަންނަ އަހަރުގެ ބަޖެޓުގައި ޑޮމެސްޓިކް މާކެޓުން ހަތް ބިލިއަން ރުފިޔާ ހޯދަން ހިމަނާފައިވާއިރު، މުނައްވަރު ވިދާޅުވީ އެމްއެމްއޭ މެދުވެރިކޮށް އެ ފައިސާ ހޯދުމަށް ބަޖެޓުގައި ނެތުމަކީ ރަނގަޅު ކަމެއް ކަމަށެވެ. އަދި ކުރިއަށް އޮތް ތަނުގައި ވެސް އެމްއެމްއޭއަށް ބަރޯސާ ނުވެ، ދައުލަތުގެ ޚަރަދުތައް ހަމަޖައްސަން ރޭވުން މުހިންމު ކަމަށް އޭނާ ފާހަގަކުރެއްވިއެވެ.

އަންނަ އަހަރުގެ ބަޖެޓް ފައިނޭންސިންގގެ ގޮތުގައި ޖުމުލަ 19 ބިލިއަން ރުފިޔާ ހޯދަން ވަނީ ކަނޑައަޅާފައެވެ. މީގެ ތެރެއިން 6.6 ބިލިއަން ރުފިޔާ ހޯދަން ހަމަޖެހިފައިވަނީ ބޭރުގެ ބޭންކުތަކުންނެވެ. މި ފައިސާ ހޯދުމަށް ކުރެވޭ މަސައްކަތްތައް ކާމިޔާބުވުމަކީ ޤައުމުގެ އިޤްތިޞާދީ ދުޅަހެޔޮކަމަށް ވަރަށް މުހިންމު ކަމެއް ކަމަށް ގަވަރުނަރު މުނައްވަރު ވިދާޅުވެފައިވެއެވެ.