އުމުރުން 65 އަހަރުގެ މީހަކު މަސްތުވާތަކެތީގެ ވިޔަފާރި ކުރާ ކަމުގެ ތުހުމަތުގައި ހައްޔަރުކޮށްފި

މާލޭގައި ދިރިއުޅެމުންދިޔަ އުމުރުން 65 އަހަރުގެ ފިރިހެނަކު މަސްތުވާތަކެތީގެ ވިޔަފާރި ކުރާ ކަމުގެ ތުހުމަތުގައި ފުލުހުން ހައްޔަރުކޮށްފިއެވެ.

ރ. އިންނަމާދޫއަށް އުފަން މުހައްމަދު ސަލީމް ހައްޔަރުކޮށްފައިވަނީ މިދިޔަ އަންގާރަ ދުވަހު ހިޔާ ފްލެޓް ޓަވަރަކުންނެވެ. ފުލުހުން ބުނާ ގޮތުގައި އޭނާގެ އަތުންނާއި ދިރިއުޅޭ އެޕާޓްމަންޓުން މަސްތުވާތަކެތި ކަމަށް ބެލެވޭ ގިނަ ޕެކެޓްތަކެއް ވަނީ ފެނިފައެވެ.

ފުލުހުން ތުހުމަތުކުރާ ގޮތުގައި ސަލީމަކީ ވަރަށް ކުރިއްސުރެ މަސްތުވާތަކެތީގެ ވިޔަފާރީގައި އުޅޭ މީހެކެވެ. 2016 ވަނަ އަހަރު ޑައިމޯފިން ޑްރަގް ޓްރެފިކްކުރި މައްސަލައެއްގައި އޭނާގެ މައްޗަށް ދަޢުވާކޮށް، 2019 ގައި އުމުރު ދުވަހަށް ޖަލަށް ހުކުމްކޮށްފައިވެއެވެ. ނަމަވެސް 2021 އިން ފެށިގެން އޭނާ ހުރީ ގޭ ބަންދުގައެވެ.

މިއަދު ބޭއްވި ފުލުހުންގެ ނޫސްވެރިންގެ ބައްދަލުވުމުގައި ޑްރަގް އެންފޯސްމަންޓް ޑިޕާޓްމަންޓުގެ ހެޑް، ސުޕްރިންޓެންޑެންޓް އޮފް ޕޮލިސް ނާހިދު ވިދާޅުވީ ގޭ ބަންދުގައި ހުރެގެން ވެސް ސަލީމް މަސްތުވާތަކެތީގެ ވިޔަފާރި ކުރާ ކަމަށެވެ. އަދި މިދިޔަ އަހަރު ވެސް ސަލީމް މަސްތުވާތަކެތި ޓްރެފިކްކުރި މައްސަލައެއް ތަޙުޤީޤުކުރި ކަމަށް ނާހިދު ވިދާޅުވިއެވެ.

ސަލީމް ގޭ ބަންދަށް ބަދަލުކުރި ސަބަބު ފުލުހުން ހާމަކޮށްފައެއް ނުވެއެވެ. ނަމަވެސް ނާހިދު ވިދާޅުވީ މަސްތުވާތަކެތި ބޭނުންކުރާ ގިނަ ބަޔަކާ ސަލީމްގެ ގުޅުން އޮންނާތީ، ގޭ ބަންދުގައި ހުރެގެން ވެސް އޭނާއަށް މަސްތުވާތަކެތީގެ ވިޔަފާރި ހިންގޭ ކަމަށެވެ. މި މައްސަލައިގައި އިތުރު ތަޙުޤީޤުތައް ކުރިއަށްދާ ކަމަށް ފުލުހުން މަޢުލޫމާތު ދީފައިވެއެވެ.