ސަރުކާރު ދެމި އޮންނާނީ ރައްޔިތުންގެ ފަޅީގައިކަމަށް ރައީސް މުޢިއްޒު ވިދާޅުވެއްޖެ

ސަރުކާރު ކުރިޔަށްދާނީ ރައްޔިތުންގެ ފަޅީގައި އޮވެ، ހުރިހާ ރައްޔިތުންނަށް އިންސާފުވެރިކަމާއެކު ތަނަވަސްކަން ހޯދައިދިނުމަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ ސޯޝަލް މީޑިއާގައި "އެކްސް" މެދުވެރިކޮށް ކުރެއްވި ޕޯސްޓެއްގައެވެ.

ރައީސް މުޢިއްޒު އިތުރަށް ވިދާޅުވެފައިވަނީ ތަނަވަސްކަން ނެތް ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ރައްޔިތުންނަށް ވަރަށް ސާފުކޮށް ފެންނާނެ ކަމަށެވެ. ރައީސް މުއިއްޒު މިފަދައިން ވިދާޅުވެފައިވަނީ ރާއްޖޭގެ މާލީ އަދި އިޤްތިޞާދީ ދާއިރާ އިޞްލާޙުކުރުމަށް އަޅުއްވާފައިވާ ފިޔަވަޅުތަކަށް ސިޔާސީ ބައެއް ފަރާތްތަކުން ދެކޮޅު ހަދަމުންދާ ދަނޑިވަޅެއްގައެވެ.

ރާއްޖޭގެ މާލީ އަދި އިޤްތިޞާދީ ޙާލަތު ރަނގަޅުކުރުމަށް ސަރުކާރުން ގެންދަނީ އިޞްލާޙީ ބައެއް ފިޔަވަޅުތައް އަޅަމުންނެވެ. މީގެ ތެރޭގައި ޑޮލަރުން އާމްދަނީ ލިބޭ ކުންފުނިތަކުން ދައުލަތަށް ދައްކަންޖެހޭ ފައިސާ ޑޮލަރުން ދެއްކޭނެ ގޮތް ހެދުމާއި، ޑޮލަރުން މުސާރަ ދޭ ކުންފުނިތަކުން ޕެންޝަން ފަންޑަށް ޖަމާކުރާ ފައިސާވެސް ޑޮލަރުން ޖަމާކުރާ ގޮތަށް ބަދަލު ގެނައުން ހިމެނެއެވެ.

މީގެ އިތުރުން، ޓެކްސް ބޭސް ބޮޑުކުރުމާއި ސަބްސިޑީތަކަށް ބަދަލު ގެނައުމަކީވެސް މާލީ ނިޒާމު ހަރުދަނާ ކުރުމަށް ސަރުކާރުން އެކުލަވާލާފައިވާ މަގުޗާޓުގައި ހިމެނޭ ކަންކަމެވެ.