ވޭޕް މަނާކުރާ ޤާނޫނު ރައީސް ތަޞްދީޤުކުރައްވައިފި

ދުންފަތް ކޮންޓްރޯލުކުރުމާބެހޭ ޤާނޫނަށް 1 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތަޞްދީޤުކުރައްވައިފިއެވެ.

މި ބިލަކީ 20 ވަނަ ރައްޔިތުންގެ މަޖިލީހުގެ 48 ވަނަ ޖަލްސާގައި ފާސްކުރެއްވި ބިލެކެވެ.

މި އިޞްލާޙުގެ ދަށުން، އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތައް ދިވެހިރާއްޖެއަށް އެތެރެކުރުމާއި، ވިއްކުމާއި، ހިލޭ ބެހުމާއި، ބޭނުންކުރުން މަނާކޮށްފައިވެއެވެ. އަދި ދައުލަތުގެ އިދާރާތަކުގައި ދުންފަތުގެ އިސްތިޢުމާލުކުރުން މަނާކޮށްފައިވެއެވެ.

21 އަހަރުން ދަށުގެ މީހުންނާއި ކުޑަކުދިންނަށް ދުންފަތުގެ އެއްވެސް ބާވަތެއް ވިއްކުން މަނާކުރުމާއެކު، ދުންފަތުގެ ބާވަތެއް ގަންނަ މީހަކީ 21 އަހަރު ވެފައިވާ މީހެއްކަން ކަށަވަރުކުރުމަށް އަންގާފައިވެއެވެ.

ދުންފަތުގެ ބާވަތްތައް އިސްތިހާރުކުރުމާއި، ސްޕޮންސަރކުރުމާއި، ޕްރޮމޯޓުކުރުން މަނާކޮށްފައިވާއިރު، ދުންފަތުގެ ބާވަތްތައް އާންމުންނަށް ފެންނާނޭހެން ބެހެއްޓުމަކީވެސް އިސްތިހާރުކުރުން ކަމުގައި ބެލެވޭނެއެވެ.

ދިވެހިރާއްޖޭގައި ދުންފަތުގެ އެއްވެސް ބާވަތެއްގެ ގަހެއް ހެއްދުމާއި ދުންފަތް އުފެއްދުން މަނާކޮށްފައިވާއިރު، ޤާނޫނާ ޚިލާފަށް ދުންފަތް އެތެރެކުރުމާއި ބޭރުކުރުމާއި ބެހުމާއި ވިއްކުންވެސް މަނާކޮށްފައިވެއެވެ.

މި ޤާނޫނާ ޚިލާފުވާ ފަރާތްތަކަށް ހަރުކަށި ޖޫރިމަނާތަކެއް ކަނޑައަޅާފައިވެއެވެ. މިގޮތުން ވޭޕް އާލާތްތައް އެތެރެކުރުމާއި ވިއްކުމަށް ބޮޑެތި ޖޫރިމަނާތަކެއް ކަނޑައަޅާފައިވެއެވެ.

މި ޤާނޫނުގެ ވޭޕްކުރުމާ ގުޅޭ މާއްދާތަކަށް ޢަމަލުކުރަން ފަށާނީ 15 ޑިސެންބަރު 2024 ގައެވެ. އަދި ދެން ހުރި މާއްދާތަކަށް ޢަމަލުކުރަން ފަށާނީ 15 ނޮވެންބަރު 2024 އިން ފެށިގެންނެވެ.