ޑރ. ޖަމްޝީދު ޑަބްލިއުއެޗްއޯގެ ބަންގްލަދޭޝް މަންދޫބަކަށް

ރާއްޖޭގެ ކުރީގެ ހެލްތު މިނިސްޓަރު ޑރ. އަހްމަދު ޖަމްޝީދު، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބަންގްލަދޭޝްއަށް ކަނޑައަޅާފައި ހުންނަވާ މަންދޫބަކަށް ހަމަޖައްސައިފިއެވެ.

މިކަން ހާމަކޮށްފައިވަނީ އިއްޔެ އެ ޖަމާއަތުގެ ބަންގްލަދޭޝް 'އެކްސް' ހޭންޑަލްއިން ކުރި ޕޯސްޓެއްގައެވެ.

ޑރ. ޖަމްޝީދު މި މަހުގެ 1 ވަނަ ދުވަހުން ފެށިގެން އެ މަގާމުގެ މަސްއޫލިއްޔަތުތަކާ ހަވާލުވެވަޑައިގެންފައިވާ ކަމަށް ބުނެފައިވެއެވެ. އޭނާއަކީ އާންމު ސިއްހަތުގެ ދާއިރާގައި 18 އަހަރަށް ވުރެ ގިނަ ދުވަހުގެ ތަޖުރިބާ ހުންނެވި ބޭފުޅެކެވެ.

ޑރ. ޖަމްޝީދު މީގެ ކުރިން ޑަބްލިއުއެޗްއޯގެ އެކި މަގާމުތައް ފުރުއްވާފައިވެއެވެ. އޭގެ ތެރޭގައި ބަންގްލަދޭޝްއަށް ކަނޑައަޅާފައި ހުންނަވާ ޑެޕިއުޓީ ރެޕްރެޒެންޓޭޓިވްގެ މަގާމާއި، އުތުރު ކޮރެއާގެ މަންދޫބުގެ މަގާމު ހިމެނެއެވެ.

ޑރ. ޖަމްޝީދަކީ ކުރީގެ ރައީސް މުހައްމަދު ވަހީދު ހަސަން މަނިކްގެ ސަރުކާރުގައި 2012 އިން 2013 އަށް ހެލްތު މިނިސްޓަރުކަން ކުރެއްވި ބޭފުޅެކެވެ. އަދި އޭޑީކޭ ހޮސްޕިޓަލުގެ ސީއީއޯގެ މަގާމުވެސް އަދާކުރައްވާފައިވެއެވެ. އޭނާ ވަނީ އިންޑިއާއާއި އިނގިރޭސިވިލާތުން މެޑިކަލް އަދި ޕަބްލިކް ހެލްތުގެ ދާއިރާއިން މަތީ ތަޢުލީމު ހާސިލުކުރައްވާފައެވެ.