ރާއްޖޭގެ ހުރިހާ ރިސޯޓެއް ހެން އެމްއެމްއޭގެ އާ ގަވާއިދަށް ރަޖިސްޓްރީވެއްޖެ

މޯލްޑިވްސް މަނިޓަރީ އޮތޯރިޓީ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަލަށް އެކުލަވާލި ގަވާއިދުގެ ދަށުން ރަޖިސްޓްރީ ވުމުގެ ސުންގަޑި ހަމަވިއިރު، އެއް ރިސޯޓު ފިޔަވައި ހުރިހާ ރިސޯޓެއް ރަޖިސްޓްރީވެފައިވާ ކަމަށް އެ އިދާރާއިން ރޭ ބުނެފިއެވެ.

އެމްއެމްއޭއިން ރޭ ދިން މަޢުލޫމާތުގައި، ރާއްޖޭގައި މިހާރު ފަތުރުވެރިކަމުގެ ޚިދުމަތް ދޭ 174 ރިސޯޓުގެ ތެރެއިން 173 ރިސޯޓެއް މިހާރު ވަނީ އާ ގަވާއިދުގެ ދަށުން ރަޖިސްޓްރީވެފައެވެ. ނަމަވެސް ރަޖިސްޓްރީ ނުވާ ހަމައެކަނި ރިސޯޓުގެ ނަން އެ އިދާރާއިން ހާމަކޮށްފައެއް ނުވެއެވެ.

ބޭރު ފައިސާ ގަނެވިއްކުމާ ގުޅޭ އާ ގަވާއިދު ބުނާ ގޮތުން ފަތުރުވެރިކަމުގެ ދާއިރާގެ މުދާ ވިއްކާ އަދި ޚިދުމަތް ފޯރުކޮށްދޭ ފަރާތްތަކުގެ ގޮތުގައި ޓެކްސް އިދާރާ، މީރާގައި ރަޖިސްޓްރީކޮށްފައިވާ ވިޔަފާރިތައް މިދިޔަ އޮކްޓޯބަރު ނިމުމުގެ ކުރިން އެމްއެމްއޭގައި ރަޖިސްޓަރީ ވާން ޖެހެއެވެ.

އެމްއެމްއޭ އިން މިދިޔަ މަހު ބުނި ގޮތުގައި، މިފަދަ ކަންކަމަކީ ރާއްޖޭގެ ބޭރު ފައިސާގެ މާކެޓް އިތުރަށް ފުޅާކޮށް، ބޭރުގެ ފައިސާ މާރުކުރުމުގެ ސިޔާސަތުތައް ފުރިހަމައަށް ތަންފީޒު ކުރުމަށް މުހިންމު ކަންތައްތަކެކެވެ. އެހެންކަމުން، އެކަންތައްތަކަށް އެއްބާރުލުން ދިނުމަށް އެދިފައިވެއެވެ.

ނަމަވެސް އެމްއެމްއޭގެ އާ ގަވާއިދުތަކާ އެއްގޮތަށް ކޮންމެ ފަތުރުވެރިއަކަށް 500 ޑޮލަރު މާރުކުރުމަކީ ކުރެވޭނެ ކަމެއް ނޫންކަން ފާހަގަކޮށް، އެ ގަވާއިދު އުވާލަން ރާއްޖޭގެ އެންމެ ބޮޑު އެއް ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު)ގެ ކުންފުނިތަކުން އިއްޔެ އެ އިދާރާގައި ވަނީ އެދިފައެވެ.

އެމްއެމްއޭ