ބަޖެޓް ބަހުސް މިރޭ 11 ޖެހުމާ ހަމައަށް ކުރިއަށް ގެންދަން ނިންމައިފި

މަޖިލިހުގައި މިރޭ 11 ޖަހަންދެން ބަޖެޓް ބަހުސް ކުރިއަށްދާނެ

އަންނަ އަހަރަށް ލަފާކުރާ ދައުލަތުގެ ބަޖެޓަށް ރައްޔިތުންގެ މަޖިލީހުގައި ބަހުސް ކުރުން މިރޭ 11 ޖެހުމާ ހަމައަށް ކުރިއަށް ގެންދަން ނިންމައިފި އެވެ.

މިއަދުގެ މަޖިލިސް ޖަލްސާގައި މި ކަމަށް ވޯޓަށް އެހުމުން، ބައިވެރިވި 52 މެންބަރުން ވެސް ވަނީ ފެންނަ ކަމަށް ވޯޓު ދެއްވާފައެވެ.

ބަޖެޓުގެ ބަހުސް މަޖިލީހުގައި ފަށާފައިވަނީ އިއްޔެ އެވެ. ނަމަވެސް ބަޖެޓު ފޮތް ލިބުމުގައި ލަސްތަކެއް ވުމުން މެންބަރުން ފޮތަށް އަހުލުވެރިވުމަށްޓަކައި ބަހުސް ކުރިއަށް ގެންދިޔައީ ދޮޅު ގަޑިއިރެއްހާ އިރަށެވެ. މިއަދުގެ ޖަލްސާއަށް އެޖެންޑާކޮށްފައިވަނީ ސަރުކާރުގެ ފަރާތުން މަޖިލީހަށް ހުށަހަޅާފައިވާ 56.6 ބިލިއަން ރުފިޔާގެ ބަޖެޓުގެ ބަހުސެވެ.

އަންނަ އަހަރަށް ލަފާކުރާ ދައުލަތުގެ ބަޖެޓު ހުށަހެޅީ މިދިޔަ މަހުގެ 31ގައެވެ. އޭގެ ފަހުން މި މަހު 4ގައި ބޭއްވި ބަޖެޓު ކޮމެޓީ ބައްދަލުވުމުގައި ވަނީ މި މަހު 20އަށް ބަޖެޓު ދިރާސާކޮށް ނިންމަން ވެސް ކަނޑައަޅާފައެވެ.

ފިނޭންސް މިނިސްޓަރު މޫސާ ޒަމީރު ވިދާޅުވެފައިވަނީ އަންނަ އަހަރަށް ލަފާކުރާ ބަޖެޓަށް ހިލޭ އެހީ އާއި އާމްދަނީގެ ގޮތުގައި 39.8 ބިލިއަން ރުފިޔާ ލިބޭނެ ކަމަށް އަންދާޒާ ކުރާ ކަމަށެވެ. އަދި ޚަރަދުތައް ހުންނާނެ ކަމަށް ލަފާކޮށްފައިވަނީ 51 ބިލިއަން ރުފިޔާގައި ކަމަށާއި، އެއީ 9.4 ބިލިއަން ރުފިޔާގެ ޑެފިސިޓެއް ކަމަށް ވެސް އެ މިނިސްޓަރު ވިދާޅުވިއެވެ.

ބަޖެޓް 2025