ބައިނަލްއަގުވާމީ މާލީ ނިޒާމު ބަދަލުކުރުމަށް ރައީސް މުއިއްޒު ގޮވާލައްވައިފި

އަޒަރްބައިޖާންގެ ވެރިރަށް ބާކޫގައި ކުރިއަށްދާ އދ.ގެ ތިމާވެއްޓާ ބެހޭ ސަމިޓް، ކޮޕް29ގައި ތަގުރީރު ކުރައްވަމުން، ބައިނަލްއަގުވާމީ މާލީ ނިޒާމު ބަދަލުކުރުމަށް ރައީސް މުހައްމަދު މުއިއްޒު ގޮވާލައްވައިފިއެވެ.

ރައީސް ވިދާޅުވީ ގައުމުތަކަށް އެހީ ދޭއިރު ކޮންމެހެން ބޭނުންޖެހިފައިވާ ކަންކަމަށް އެހީތެރިކަން ފޯރުކޮށްދިނުމަށް އިސްކަންދޭންޖެހޭ ކަމަށެވެ.

މޫސުމީ ބަދަލުތަކާ ދެކޮޅަށް ރާއްޖެއިން ކުރަމުންދާ މަސައްކަތްތައް ފާހަގަކުރައްވަމުން، ރައީސް ވިދާޅުވީ އެ މަސައްކަތްތަކާއި ލަނޑުދަނޑިތައް ހާސިލުކުރުމަށް ކުރިމަތިވެފައިވާ އެންމެ ބޮޑު ގޮންޖެހުމަކީ މާލީ ދަތިކަން ކަމަށެވެ. އަދި މޫސުމީ ބަދަލުތަކާ ދެކޮޅަށް ކުރާ މަސައްކަތްތަކަށް އެހީ ދިނުމަށް ފައިސާގެ މިންވަރު ކަނޑައެޅުމުގައި މޫސުމީ ކާރިސާތަކުގެ ހަގީގީ މިންގަނޑުތަކަށް ރިއާޔަތްކުރަންޖެހޭ ކަމަށް ވިދާޅުވިއެވެ.

ރައީސް އިތުރަށް ފާހަގަކުރެއްވި ގޮތުގައި ކުދި ޖަޒީރާ ގައުމުތަކުގެ ތަރައްގީގެ ހާލަތާއި މޫސުމީ ބަދަލުތަކަށް ހޭނިފައިވާ މިންވަރު އަދި ގެއްލުންތައް ކުޑަކުރެވޭ މިންވަރާއި ލިބޭ ގެއްލުންތަކަށް ބަލައިގެން މާލީ އެހީ އިތުރުކޮށްދޭން ޖެހެއެވެ. އަދި ދުނިޔެއިން ފެންނަމުންދަނީ ހަނގުރާމަތަކަށް ފަސޭހަކަމާއެކު ފައިސާގެ އެހީތެރިކަން އޮއްސަމުންދާއިރު، މޫސުމީ ބަދަލުތަކަށް އެހީތެރިކަން ފޯރުކޮށްދެނީ ވަރަށް ބަލައިގެން ކަމަށް ފާހަގަކުރެއްވިއެވެ.

ރައީސް މުއިއްޒު ވިދާޅުވީ މޫސުމީ ބަދަލުތަކަށް ފޯރުކޮށްދެމުންދާ އެހީތެރިކަން އަދިވެސް ވަރަށް ބޮޑުތަން ކުޑަކަމަށާއި، އެކަމުގެ ސަބަބުން މޫސުމީ ބަދަލުތަކާ ދެކޮޅަށް ކުރާ މަސައްކަތްތަކުގައި އުންމީދުތައް ފަނޑުވަމުންދާ ކަމަށެވެ. ނަމަވެސް މިފަހަރުގެ ކޮޕް ސަމިޓުގައި އެކަން ބަދަލުކުރެވޭނެކަން ސާބިތުކޮށްދިނުމަށް ރައީސް ގޮވާލެއްވިއެވެ.