ކައުންސިލްތަކަށް ދޭ ބްލޮކް ގްރާންޓް 2.2 ބިލިއަން ރުފިޔާއަށް އިތުރުކޮށްފި

އަންނަ އަހަރުގެ ބަޖެޓުގައި ކައުންސިލްތައް ހިންގުމަށް ރަނގަޅު އަދަދެއް ހުށަހެޅިފައިވޭ

އަންނަ އަހަރު ބްލޮކް ގްރާންޓުގެގޮތުގައި ކައުންސިލްތަކަށް 2.2 ބިލިޔަން ރުފިޔާ ދޫކުރުމަށް ދައުލަތުގެ ބަޖެޓުގައި ހިމަނައިފިއެވެ.

މިއީ 2023 ވަނަ އަހަރު ދޫކޮށްފައިވާ މިންވަރަށްވުރެ 14.3 އިންސައްތަ އިތުރު އަދަދެކެވެ.

ކުރިން އަންނަ އަހަރު ކައުންސިލްތަކަށް ދޫކުރާ ބްލޮކް ގްރާންޓުގެ މިންވަރުގެ ގޮތުގައި ހިމަނާފައި އޮތީ 1.4 ބިލިޔަން ރުފިޔާއެވެ. ނަމަވެސް މިހާރު ހުށަހަޅާފައިވަނީ ލާމަރުކަޒީ ޤާނޫނުގައިވާ ގޮތުގެ މަތިން އަންދާޒާކުރާ އާމްދަނީގެ މަދުވެގެން 5 އިންސައްތަ އަދި ކައުންސިލްތަކުގެ އިޚްތިޞާޞްގައި ނުހިމެނޭ ސަރަހައްދުތަކުގެ ކުލީގެ 40 އިންސައްތައާ އެއްވަރުގެ އަދަދެއް ކަމަށްވާ 2.1 ބިލިޔަން ރުފިޔާއެވެ.

ބްލޮކް ގްރާންޓު ދޭ ގޮތް ބަދަލުކުރަން ފުރަތަމަ ހުށަހަޅާފައިވަނީ އާމްދަނީ އިތުރުވަމުންދާއިރު، ކައުންސިލްތަކުގެ ބްލޮކް ގްރާންޓުވެސް އެއާ އެއްމިންވަރަކަށް އިތުރުކުރުމަށެވެ. އަދި ކައުންސިލްތަކުން އަމިއްލައަށް ހޯދާ އާމްދަނީވެސް އިތުރުވަމުންދާއިރު، ކައުންސިލްތަކުގެ އާންމު ޚަރަދުތައް އެއާ އެއްހަމައަކުން އިތުރުވަމުންނުދާކަން ފާހަގަވެފައިވާތީއެވެ.

ނަމަވެސް މިވަގުތު ބްލޮކް ގްރާންޓް ހިސާބުކުރާ ގޮތް ބަދަލު ނުކުރަން ނިންމާފައިވާކަމަށް ދައުލަތުގެ ބަޖެޓު ޕޮޒިޝަން ރިޕޯޓުގައި ބުނެފައިވެއެވެ. އަދި އެ ނިންމުމާ ގުޅިގެން ގެންނަންޖެހޭ ބަދަލުތައް ރައްޔިތުންގެ މަޖިލީހަށް މިހާރު ހިއްސާކޮށްފައިވާކަމަށްވެސް ރިޕޯޓުގައި ބަޔާންކޮށްފައިވެއެވެ.

ބަޖެޓް 2025