މުއްސަނދިން ފައިސާ ދައްކަންޖެހޭ ގޮތަށް، އާސަންދަ ނިޒާމަށް ބޮޑެތި ބަދަލުތަކެއް

ދައުލަތުގެ ހަރަދުގައި ހިލޭ ބޭސްފަރުވާ ކޮށްދޭ ނިޒާމު އާސަންދަ އަށް ކުރާ ހޭދަ ކުޑަކުރުމަށްޓަކައި އެންމެ މުއްސަނދިން އަންނަ އަހަރުން ފެށިގެން ވަކި އަދަދެއް އެ ނިޒާމަށް ދައްކަންޖެހޭ ގޮތަށް ބަދަލު ގެންނަން ސަރުކާރުން ނިންމައިފި އެވެ.

އަންނަ އަހަރަށް ލަފާކޮށް ރައްޔިތުންގެ މަޖިލިހަށް ހުށަހަޅާފައިވާ ބަޖެޓުގައިވާ ގޮތުން، އާސަންދައިގެ ހަރަދުތައް ދެމެހެއްޓެނިވި މިންގަނޑެއްގައި ހިފެހެއްޓުމަށްޓަކައި މުހިއްމު ދެ ބަދަލެއް އަންނަ އަހަރުގެ އޭޕްރީލް އިން ފެށިގެން ގެންނާނެ އެވެ. މި ބަދަލުތަކާ އެކު، އާސަންދަ އިން 600 މިލިއަން ރުފިޔާއާ ގާތް ކުރާ އަދަދެއް ކުޑަ ކުރެވޭނެ ކަމަށް ލަފާކުރެ އެވެ.

މަހަކު 60،000 ރުފިޔާއަށް ވުރެ ބޮޑު އާމްދަނީ ލިބޭ ނުވަތަ އިންކަމް ޓެކްސް ދައްކަން ޖެހޭ މީހުންގެ އަތުން ވަކި އަދަދެއް ނަގަން ވަނީ ކަނޑައަޅައިފައެވެ. ފިނޭންސް މިނިސްޓްރީން ބުނީ، މި ކޮންޓްރިބިއުޝަންގެ ސަބަބުން، މުޅި ނިޒާމު ޕްރޮގްރެސިވް ކުރެވި، އެންމެ ފަގީރު ހާލުގައި އުޅޭ މީހުންނަށް މާލީ ބުރައަކާ ނުލައި ސިއްހީ ހިދުމަތްތައް ލިބޭކަން ކަށަވަރު ކުރެވޭނެ ކަމަށެވެ.

އެންމެ މުއްސަދިންގެ އަތުން ފާމަސީތަކާއި ސަރުކާރުގެ ހޮސްޕިޓަލުތަކުން ހޯދާ ބައެއް ސިއްހީ ހިދުމަތްތަކަށް ވެސް ކޯ-ޕޭ ނިޒާމެއް ތައާރަފް ކުރުމަށް ޕްލޭން ކޮށްފައިވެ އެވެ. އެންމެ ގިނައިން އާމްދަނީ ލިބޭ މީހުން އައުޓްޕޭޝަން ހިދުމަތްތައް ހޯދާ އިރާއި އެސެންޝަލް ނޫން ބޭސް ގަންނަ އިރު ބިލްގެ ވަކި މިންވަރެއް ކޮންޓްރިބިއުޝަނެއްގެ ގޮތުގައި ދައްކަން ޖެހޭ ގޮތަށް ބަދަލުކޮށް އަމަލު ކުރަން ވަނީ ނިންމައިފައެވެ.

އާސަންދަ ހިދުމަތް ފޯރުކޮށްދޭ އަމިއްލަ ތަންތަނުން ހިދުމަތް ހޯދާއިރު، އާސަންދަ ސްކީމުން ކަވަރު ކުރަނީ ބިލްގެ ވަކި އަދަދެކެވެ. ބާކީ ބައި އަދާކުރަނީ ހިދުމަތް ހޯދާ މީހުންނެވެ. އާސަންދައިން ކަވަރު ކުރާ އަދަދު ޖުމްލަގޮތެއްގައި އެއްގޮތް ނަމަވެސް އަމިއްލަ ޖީބުން ދައްކަން ޖެހޭ ބައި އެކި ހޮސްޕިޓަލުތަކުގައާއި ކްލިނިކްތަކުގައި ތަފާތެވެ.