ވޭޕް މަނާކުރުމަށް ހުށަހެޅި އިސްލާހު މަޖިލީހުން ފާސްކޮށްފި

މަޖިލިހުން ބިލް ފާސްކޮށްފައިވަނީ 54 މެމްބަރުންގެ އަގުލަބިއްޔަތުން / ފޮޓޯ:މަޖިލިސް

ވޭޕް މަނާ ކުރުމަށް ދުންފަތް ކޮންޓްރޯލް ކުރުމުގެ ގާނޫނަށް ސަރުކާރުގެ ފަރާތުން ހުށަހެޅި އިސްލާހު މަޖިލީހުން މިއަދު ފާސްކޮށްފި އެވެ.

މި ބިލު ފާސްކޮށްފައިވަނީ މިއަދު ބޭއްވުނު މަޖިލީހުގެ ޖަލްސާގައި 54 މެންބަރުންގެ ވޯޓުންނެވެ. އަށް މެންބަރުން ވަކި ކޮޅަކަށް ވޯޓެއް ނުދެއްވައެވެ.

ސަރުކާރުގެ ފަރާތުން ހެންވޭރު އުތުރު ދާއިރާގެ ޕީއެންސީ މެންބަރު އަހްމަދު އައިފާން މިދިޔަ މަހު ފަހުކޮޅު ހުށަހެޅުއްވި މި ބިލުގެ ދިރާސާ ކުރި އިޖުތިމާއީ ކޮމިޓީން އެންމެ ފުރަތަމަ ނިންމީ، ބިލުގައިވާ މުއްދަތު ތެރޭ ވޭޕް މަނާ ކުރެވޭ ގޮތަށް އެ މުއްދަތު ތެރޭގައި ބިލު ދިރާސާކޮށް ނިންމުމަށެވެ. ނަމަވެސް ފަހުން އެ ކޮމިޓީން ބޭނުންވީ އަވަސް އަރުވާލައިގެން ބިލު ފާސް ނުކޮށް، ދިރާސާ ކުރުމަށް އިތުރު ވަގުތު ނެގުމަށެވެ.

މިދިޔަ ހަފްތާ އަންގާރަ ދުވަހު ބޭއްވި އެ ކޮމިޓީގެ ބައްދަލުވުމުގައި ނިންމާފައި އޮތީ މި މަހު 21އަށް ބިލުގެ ސުންގަޑި ދިގު ދެންމުމަށެވެ. ނަމަވެސް ފަހުން އަނެއްކާވެސް ކުއްލި ގޮތަކަށް މިދިޔަ ބުދަ ދުވަހު ހަވީރު ބޭއްވި އެ ކޮމިޓީގެ ބައްދަލުވުމުގައި، ސަރުކާރުން ފޮނުވި މައިގަނޑު ހުރިހާ އިސްލާހުތަކާ އެކު ކުދި އިސްލާހުތަކެއް ގެނެސް، ބިލު ފާސް ކުރަން ކޮމިޓީން ނިންމާފައިވެއެވެ.

މި ބިލު ރައީސް ތަސްދީގު ކުރެއްވުމާ އެކު، އަންނަ ހުކުރު ދުވަހުން ފެށިގެން ވޭޕް ރާއްޖެ އެތެރެ ކުރުން މަނާވާނެ އެވެ. އަދި އަންނަ މަހު 15 އިން ފެށިގެން ވޭޕް ބޭނުން ކުރުމާއި ވިއްކުން އަދި ބެހުން މަނާވާނެ އެވެ. މަނާ ކުރާ ފަހުން މިކަން ކޮށްފި ނަމަ، ބޮޑެތި ޖޫރިމަނާ އަންނާނެ އެވެ.

ސިއްޙަތު ރައްޔިތުންގެ މަޖިލިސް