އިސްލާމީ-އަރަބި ސަމިޓުން އިސްރާއީލް އދ. އިން ވަކިކުރުމަށް ގޮވާލައިފި

ސައުދީ އަރާބިއާގެ ވެރިރަށް ރިޔާދުގައި އިއްޔެ ބޭއްވުނު އިސްލާމީ-އަރަބި ސަމިޓުގައި ބައިވެރިވި ޤައުމުތަކުގެ އިސްވެރިން، ފަލަސްތީނުގެ މައްޗަށް އިސްރާއީލުން ދަނީ ހިންގަމުން ގެންދާ އަނިޔާވެރި ޢަމަލުތައް ހުއްޓުވުމަށާއި، އެ ޤައުމު އދ. އިން ވަކިކުރުމަށް ގޮވާލައިފިއެވެ.

ތުރުކީގެ ރައީސް ރަޖަބް ތައްޔިބް އުރުދުޣާން ވިދާޅުވީ އިސްރާއީލްގެ މަޤްޞަދަކީ ގާޒާ އަތުލުމާއި ފަލަސްތީނުގެ ވުޖޫދު ނައްތާލުން ކަމަށެވެ. މިސުރުގެ ރައީސް އަބްދުލްފައްތާހު އައްސީސީ އާއި ޖޯޑަންގެ ކިންގް އަބްދުﷲ ވެސް ވަނީ އިސްރާއީލްގެ އަމަލުތައް ކުށްވެރިކުރައްވާފައެވެ.

ފަލަސްތީނުގެ ރައީސް މަހުމޫދު އައްބާސް ގޮވާލެއްވީ އިސްރާއީލް އދ. އިން ސަސްޕެންޑްކުރުމަށް މަސައްކަތްކުރުމަށެވެ. މެލޭޝިއާގެ ބޮޑުވަޒީރު އަންވަރު އިބްރާހީމް ވިދާޅުވީ ހަރުކަށި ނިންމުންތަކެއް ނިންމަން ޖެހިފައިވާ ކަމަށެވެ. ލުބުނާންގެ ބޮޑުވަޒީރު ނަޖީބު މީކާތީ ވިދާޅުވީ އިސްރާއީލްގެ އަނިޔާވެރި ހަމަލާތަކުގެ ސަބަބުން ބައިނަލްއަޤްވާމީ ޤާނޫނުތަކާ ޚިލާފުވަމުންދާ ކަމަށެވެ.

މި ސަމިޓުގައި ބައިވެރިވި އެހެން ގައުމުތަކުގެ އިސްވެރިންވެސް ވަނީ ފަލަސްތީނުގެ މައްސަލައާ ގުޅޭގޮތުން ވާހަކަދައްކަވާފައެވެ. ގިނަ ލީޑަރުން އެއްބަސްވެވަޑައިގަތީ އިސްރާއީލްގެ އަމަލުތައް ކުށްވެރިކުރުމަށާއި، ފަލަސްތީނު ރައްޔިތުންނަށް އެހީތެރިކަން ފޯރުކޮށްދިނުމަށް އިތުރު މަސައްކަތްތަކެއް ކުރަންޖެހޭ ކަމަށެވެ.

ސަމިޓުގެ ނިންމުމުގައި، ބައިވެރިވި ގައުމުތަކުން އެއްބަސްވެފައިވަނީ ފަލަސްތީނުގެ މައްސަލަ ހައްލުކުރުމަށް އެކުގައި މަސައްކަތްކުރުމަށާއި، އިސްރާއީލްގެ އަނިޔާވެރި އަމަލުތައް ހުއްޓުވުމަށް ބައިނަލްއަގްވާމީ މުޖުތަމަޢުގެ އެހީތެރިކަން ހޯދުމަށެވެ. އަދި ފަލަސްތީނު ދައުލަތެއް ގާއިމުކުރުމަށް ބާރުއަޅައި، އެކަމަށް އެހީތެރިވުމަށްވެސް އެއްބަސްވެފައިވެއެވެ.