ތާލިބާނުން އދ.ގެ މޫސުމާ ބެހޭ ކޮންފަރެންސްގައި ބައިވެރިވަނީ

ކޮޕް 29 ދުނިޔޭގެ ގިނަ ގައުމުތަކަކުން ބައިވެރިވާނެ

އަފްޣާނިސްތާނުގެ ވެރިކަންކުރާ ތާލިބާނުން އަންނަ ހަފުތާގައި ފަށާ އދ.ގެ މޫސުމާ ބެހޭ ބޮޑު ކޮންފަރެންސް، ސީއޯޕީ29 ގައި ބައިވެރިވާނެ ކަމަށް އަފްޣާން ޚާރިޖީ ވުޒާރާއިން ބުނެފިއެވެ.

މިއީ 2021 ވަނަ އަހަރު ތާލިބާނުން އަފްޣާނިސްތާނުގެ ވެރިކަމާ ހަވާލުވި ފަހުން މިފަދަ ކޮންފަރެންސެއްގައި ބައިވެރިވާ ފުރަތަމަ ފަހަރެވެ.

އަޒަރުބައިޖާންގެ ވެރިރަށް ބާކޫގައި ބާއްވާ މި ސަމިޓަކީ ތާލިބާނުންގެ އޮފިޝަލުން ބައިވެރިވާ އެންމެ މަތީ ފެންވަރުގެ މަލްޓިލޭޓަރަލް އިވެންޓްތަކުގެ ތެރޭގައި ހިމެނޭ އިވެންޓެކެވެ. ނަމަވެސް، އަންހެނުންގެ ތައުލީމާއި މިނިވަންކަމަށް ތާލިބާނުން ކަނޑައަޅާފައިވާ ހުރަސްތަކުގެ ސަބަބުން އދގެ އާންމު މަޖިލީހުގައި އަފްޣާނިސްތާނުގެ ގޮނޑިއަށް ތާލިބާނުންނަށް ފުރުސަތު ދީފައެއްނުވެއެވެ.

މި ފަހަރުގެ ކޮންފަރެންސްގައި އަފްޣާން އެންވަޔަރަންމަންޓް އެޖެންސީގެ އޮފިޝަލުން ބައިވެރިވާނީ އޮބްޒާވަރުންގެ ގޮތުގައެވެ. އަފްޣާނިސްތާނަކީ މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް އަސަރުކުރާ ގައުމުތަކުގެ ތެރެއިން އެއް ގައުމެވެ.

ފެންބޮޑުވުމާއި ހަނަފަސްކަމުގެ ސަބަބުން އަފްޣާނިސްތާނަށް ވަނީ ބޮޑެތި ގެއްލުންތަކާ ކުރިމަތިލާން ޖެހިފައެވެ. މި ކޮންފަރެންސްގައި ބައިވެރިވުމަކީ މި މައްސަލަތަކަށް ހައްލެއް ހޯދުމަށް ތާލިބާނުން އަޅާ މުހިންމު ފިޔަވަޅެއް ކަމުގައި ބެލެވެއެވެ.

ކޮޕް29