ވެރިކަމަކީ ރައްޔިތުންނަށް ޚިދުމަތްކުރުމުގެ އަމާނާތެއް: ރައީސް މުއިއްޒު

ރައީސް މުހައްމަދު މުއިއްޒު ވާހަކަފުޅު ދައްކަވަމުން ވިދާޅުވެފައިވަނީ ވެރިކަމަކީ ރައްޔިތުންނަށް ޚިދުމަތްކުރުމުގެ އަމާނާތެއްކަމަށް ރައީސުލްޖުމުހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ  ޖުމްހޫރީ ދުވަސް ފާހަގަ ކުރު ކުރުމަށް ރޭ ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރޭ ބޭއްވުނު މި ޚާއްޞަ ޖަލްސާގައި އެ މަނިކުފާނުގެ ވާހަކަފުޅު ކުރިއަށް ގެންދެވުމުގައި އެމަނިކުފާނުގެ ބައްޕާފުޅު ލިޔުއްވާފައިވާ ފޮތެއް ބޭނުންކުރައްވާފައި ވެއެވެ.

ރައީސް މުއިއްޒު ވިދާޅުވި ގޮތުގައި ވެރިކަމަކީ އެއްވެސް ހާލެއްގައި ލިބޭ މާ ބޮޑު މޮޅެއް ނޫނެވެ. އަދި އެއީ ވެރިކަން ކުރާ މީހާގެ އަމިއްލަ މުދާގަނޑެއް ވެސް ނޫނެވެ. އޭގެ ބަދަލުގައި، ވެރިކަމަކީ ވަރުގަދަ ޒިންމާއެއް، މަސްއޫލިއްޔަތެއް އަދި އަމާނާތެއް ކަމަށް އެ މަނިކުފާނު ވިދާޅުވިއެވެ.

ރައީސް މުއިއްޒުގެ ބައްޕާފުޅުގެ ފޮތުން ހަވާލާދެއްވަމުން، ރައްޔިތުންނަކީ ގައުމުގައި އެންމެ ހައިބަތު ބޮޑު، ގަދަރު އުފުލިގެންވާ ފަރާތް ކަމަށް ވިދާޅުވިއެވެ. އަދި ވަލިއްޔުލް އަމްރަކީ ރައްޔިތުންގެ މަސްއޫލިއްޔަތު ބަލަހައްޓަން ހަވާލުކޮށްފައިވާ ހަވާލުދާރެއް، ވަކީލެއް އަދި ޚާދިމެއް ކަމަށް ވިދާޅުވިއެވެ.

މި އުސޫލުތަކަށް ރިއާޔަތްކޮށް، މިދިޔަ އެއް އަހަރު ދުވަހު ރައްޔިތުންގެ ފަޅީގައި ހުރެގެން މަސައްކަތްކުރެއްވި ކަމަށް ރައީސް މުއިއްޒު ވިދާޅުވިއެވެ. އަދި ގިނަ ދުވަސްތަކެއް ވާންދެން އަތްނުލެވި ހުރި ގިނަ މައްސަލަތަކެއް ހައްލު ކުރެވޭތޯ ބެއްލެވި ކަމަށް ވިދާޅުވިއެވެ.

ރައީސް މުއިއްޒު ވިދާޅުވި ގޮތުގައި، ޑްރަގްގެ މައްސަލަތަކާއި ގޭންގު މާރާމާރީގެ މައްސަލަތައް ހައްލުކުރުމަށާއި، ވޭޕް މަނާކުރުމަށާއި، ބޭހުގެ މާފިޔާ ނައްތާލުމަށް މަސައްކަތްކުރެއްވީ ރައްޔިތުންގެ ފަޅީގައި ހުންނަވައި ރައްޔިތުންނަށް ޚިދުމަތްކޮށްދެވުމުގެ ގޮތުންނެވެ. އަދި މި މަސައްކަތުގައި ރައްޔިތުން ވެސް އެ މަނިކުފާނާ އެކު ސާބިތުވެ ތިބުމަކީ އެ މަނިކުފާނުގެ އުއްމީދު ކަމުގައި ވިދާޅުވިއެވެ.