ވަޒީރު ޠާރިޤް "ކޮޕް 29" ގައި ބައިވެރިވެވަޑައިގަތުމަށް ބާކޫއަށް ފުރާވަޑައިގެންފި

މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހީމް ތިމާވެށީގެ އެންމެ ބޮޑު ބައްދަލުވުން ކަމުގައިވާ "ކޮޕް 29" ގައި ބައިވެރިވެވަޑައިގަތުމަށް އަޒަރުބައިޖާންގެ ވެރިރަށް ބާކޫއަށް ފުރާވަޑައިގެންފިއެވެ.

ވަޒީރުގެ އަރިހުގައި އެ ވުޒާރާގެ އިސްވެރިންގެ ޓީމެއް ބައިވެރިވެވަޑައިގަންނަވައެވެ.

މިފަހަރުގެ ކޮޕް ސަމިޓުގައި ރާއްޖެއިން މުހިންމު ދައުރެއް އަދާކުރާނެ ކަމަށް ވަޒީރު ޠާރިޤް ވިދާޅުވެފައިވެއެވެ. ކޮޕްގެ ހަވާސާގައި ރާއްޖެއިން 4 އިވެންޓެއް އިންތިޒާމުކުރުމަށް ވަނީ ހަމަޖެހިފައެވެ. މީގެ ތެރޭގައި އިއާދަކުރަނިވި ހަކަތައާ ގުޅޭ އިވެންޓަކާއި، ފަރުތައް ހިމާޔަތްކުރުމުގެ މުހިންމުކަމާ ގުޅޭ އިވެންޓެއް ހިމެނެއެވެ.

ކޮޕަށް ދިއުމުގެ ކުރިން، ތިމާވެއްޓާ ގުޅޭ މައްސަލަތަކާ ގުޅޭގޮތުން ޒުވާނުންގެ ޚިޔާލު ހޯދުމަށް ޚާއްސަ އިވެންޓެއް ވަނީ ކުރިއަށް ގެންގޮސްފައެވެ. މި ޚިޔާލުތަކަށް ބިނާކޮށް، ކޮޕަށް ގެންދިއުމަށް ރާއްޖޭގެ ޒުވާނުންގެ ފަރާތުން ޚާއްސަ ސްޓޭޓްމަންޓެއް ވަނީ ތައްޔާރުކޮށްފައެވެ.

ކޮޕް 29 ގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެވަޑައިގެން ތަޤުރީރު ކުރެއްވުމަށް ވަނީ ހަމަޖެހިފައެވެ. މޫސުމީ ބަދަލުތަކުން އަރައިގަތުމަށް ކުރާ ހޭދައަށް ބޭނުންވާ މާލީ އެހީ، ރާއްޖެ ފަދަ ޤައުމުތަކަށް ހޯދައި ދިނުމަށް ރާއްޖެއިން ދަނީ ކޮޕްގައި ވަކާލާތުކުރަމުންނެވެ.

މިއަހަރުގެ ކޮޕް ސަމިޓު ކުރިއަށްދާނީ މި މަހުގެ 11 އިން 22 ގެ ނިޔަލަށް އަޒަރުބައިޖާންގެ ވެރިރަށް ބާކޫގައެވެ. މިއަހަރު ކޮޕްގެ ޝިޢާރަކީ "އިން ސޮލިޑޭރިޓީ ފޯރ އަ ގްރީން ވޯލްޑް" އެވެ. މިއީ ދުނިޔެއަށް ކުރިމަތިވަމުންދާ ތިމާވެށީގެ މައްސަލަތަކާ ގުޅޭގޮތުން އދ.ގެ މެމްބަރު ޤައުމުތަކުގެ ތެރެއިން ކުދި ބޮޑު ހުރިހާ ޤައުމަކުން ބައިވެރިވާ އެންމެ ބޮޑު ސަމިޓެވެ.