ސްޓެލްކޯއިން ކަނޑުގެ ރާޅާއި އޮއިން ހަކަތަ އުފެއްދުމުގެ ދިރާސާއެއް ފަށައިފި

ސްޓެލްކޯއިން ކުރިއަށް ގެންދާ ޕްރޮޖެޓްގެ ތެރެއިން

ސްޓެލްކޯއިން ކަނޑުގެ ރާޅާއި އޮއިން ހަކަތަ އުފެއްދުމުގެ ދިރާސާއެއް ފަށާފިއެވެ.

މިކަން ހާމަކުރެއްވީ އެ ކުންފުނީގެ މެނޭޖިން ޑިރެކްޓަރު ހުސެއިން ފަހުމީއެވެ.

ފަހުމީ ވިދާޅުވެފައިވަނީ މި ދިރާސާއިން ކަނޑުގެ އޮއިން ހަކަތަ އުފެއްދޭނެ ގޮތްތަކެއް ހޯދުމާއެކު، ސޯލާއަށްވުރެ ބޮޑަށް އެކަން ފުޅާކޮށް ދެމެހެއްޓެނިވި ގޮތެއްގައި މަސައްކަތްތައް ކުރެވޭނެ މަގުތައް ހުޅުވިގެންދާނެ ކަމަށެވެ. މި މަޝްރޫޢުގެ ދަށުން ކަނޑުގެ ރާޅުތަކަކީ ފައިދާހުރި ހަކަތައިގެ ވަސީލަތެއްގެ ގޮތުގައި އޮތުމުގެ ފުރުސަތު ދެނެގަތުމަށް ހަރުދަނާ ޑޭޓާ އެއްކުރުމާއި އެނަލައިޒް ކުރުން ހިމެނޭ ކަމަށްވެސް އޭނާ ވިދާޅުވިއެވެ.

ފަހުމީ އިތުރަށް ވިދާޅުވެފައިވަނީ ކަނޑުގެ ރާޅުތަކަކީ އިރުގެ ހަކަތައަށްވުރެ މޫސުމުގެ ހާލަތުގެ އަސަރު ކުޑަ ރާޅުތަކަކަށްވާތީ، ހަކަތައިގެ ސަޕްލައި މިހާރަށްވުރެ ހަރުދަނާ ގޮތެއްގައި ފޯރުކޮށްދެވިދާނެ ކަމަށެވެ. އަދި މި ދިރާސާގެ އަލީގައި ސްޓެލްކޯގެ އަމާޒަކީ މިހާރު ހުރި އިއާދަކުރަނިވި ވަސީލަތްތައް ފުރިހަމަ ކުރާނެ ގޮތް ދެނެގަނެ، މިހާރަށްވުރެ ހަރުދަނާ އިތުބާރު ކުރެވޭ ހަކަތައިގެ ގްރިޑެއް ގާއިމު ކުރުން ކަމަށްވެސް ފަހުމީ ވިދާޅުވެފައިވެއެވެ.

މި މަސައްކަތަކީ ރައީސް ޑރ. މުހައްމަދު މުއިއްޒުގެ ވައުދެއް ކަމަށްވާ 2028 ގައި ރާއްޖޭގައި ބޭނުންކުރާ ކަރަންޓުގެ 33 ޕަސެންޓް އިޔާދަ ކުރަނިވި ހަކަތައިން އުފެއްދުމުގެ މަގުފަހިކުރުމަށް ކުރެވޭ މަސައްކަތެއްގެ ގޮތުގައި ބެލެވެއެވެ.

ސްޓެލްކޯ