ހިޔާވެހި ސްކީމްގެ ދަށުން ބޯހިޔާވަހިކަމުގެ ލޯނަށް އެދުމުގެ ފުރުސަތު ހުޅުވާލައިފި

ހިޔާވަހި ސްކީމް އިފްތިތާޙުކުރުން

ހިޔާވެހި ސްކީމްގެ ދަށުން ބޯހިޔާވަހިކަމުގެ ލޯނަށް އެދުމުގެ ފުރުސަތު ސަރުކާރުން މިއަދު ހުޅުވާލައިފައެވެ.

މިއީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެއް ފުއްދުމުގެ ގޮތުން ތަޢާރަފުކޮށްފައިވާ "ހިޔާވަހި ފައިނޭންސިން ސްކީމް" ގެ ދަށުން ދޫކުރާ ލޯނެކެވެ.

މި ސްކީމުގެ ދަށުން ލޯނު ދޫކުރަނީ ތިން ކެޓަގަރީއަކަށެވެ. އެއީ ހުރިހާ ރަށަކަށް ދޫކުރާ އެއް މިލިއަން ރުފިޔާގެ ސްކީމް، އާބަން ސަރަހައްދުތަކަށް ދޫކުރާ ތިން މިލިއަން ރުފިޔާގެ ސްކީމް، އަދި މާލެ ސަރަހައްދަށް ދޫކުރާ ހަ މިލިއަން ރުފިޔާގެ ސްކީމެވެ.

ލޯނު ދޫކުރަނީ ބީއެމްއެލް، އެޗްޑީއެފްސީ އަދި އެމްއައިބީ މެދުވެރިކޮށް، ފަސް ޕަސެންޓް އިންޓްރެސްޓް ރޭޓުގައެވެ. ލޯނު އަނބުރާ ދެއްކުމަށް 25 އަހަރުގެ މުއްދަތެއް ދެވޭނެއެވެ.

އެއް މިލިއަން ރުފިޔާގެ ސްކީމުގައި ބައިވެރިވާ ފަރާތްތަކުން އިކުއިޓީގެ ގޮތުގައި އެއްވެސް އަދަދެއް ދައްކާކަށް ނުޖެހޭނެއެވެ. ނަމަވެސް އާބަން ސަރަހައްދުތަކުގެ ލޯނުގައި ފަސް ޕަސެންޓް އަދި މާލެއިން ގެދޮރު އަޅަން ލޯނު ނަގާ ފަރާތްތަކުން 10 ޕަސެންޓް އިކުއިޓީ ބަހައްޓަން ޖެހޭނެއެވެ.

މި ސްކީމަށް ކުރިމަތިލުމުގެ ފުރުސަތު އޮތީ މިއަދުން ފެށިގެން އަންނަ އަހަރުގެ އޭޕްރީލް 8 ވަނަ ދުވަހާ ހަމައަށެވެ. އަންނަ އަހަރުގެ ބަޖެޓުގައި ގެދޮރުވެރިކަމަށް ޖުމްލަ 4.8 ބިލިއަން ރުފިޔާ ކަނޑައަޅާފައިވާއިރު، އޭގެ ތެރެއިން އެއް ބިލިއަން ރުފިޔާ ވަނީ ހައުސިން ލޯނަށް ޚާއްޞަކޮށްފައެވެ.

ހައުސިންގ މިނިސްޓްރީ