ކައިވެނީގެ ރަނަށް ކީ 85،000 ރުފިޔާ ދެއްކުމަށް ފެމިލީ ކޯޓުން ހުކުމްކޮށްފި

ކައިވެނީގެ ރަނަށް ކީ 85،000 ރުފިޔާ ނުދީގެން ހުށަހެޅުނު މައްސަލައެއްގައި، އެ ފައިސާ ކުރިއަށް އޮތް 10 މަސް ދުވަސް ތެރޭގައި ދެއްކުމަށް ފެމިލީ ކޯޓުން ހުކުމްކޮށްފިއެވެ.

މި ހުކުމް ކުރެއްވީ ފެމިލީ ކޯޓުގެ އިސް ގާޒީ އިބްރާހީމް މާހިރެވެ.

މައްސަލައިގެ ތަފްސީލުތަކަށް ބަލާއިރު، ފިރިހެން މީހާއަކީ ކައިވެނިކޮށްގެން އުޅުނު ދުވަސްވަރު ވެސް އެއްވެސް ހަރަދެއް ނުކުރާ މީހެއްކަން އެނގެއެވެ. އަދި އޭނާއަކީ މަސްތުވާތަކެތީގެ ވަބާގައި ޖެހިގެން ފަރުވާ ހޯދަމުންދާ މީހެއްކަން ވެސް ން ވެސް ފާހަގަކުރެވިފައިވެއެވެ.

ކޯޓުގައި މައްސަލަ ބެލިއިރު، ފިރިހެން މީހާ ވަނީ މި މަހުން ފެށިގެން ކުރިއަށް އޮތް 10 މަހަށް ބަހާލައިގެން ފައިސާ ދެއްކުމަށް އެއްބަސްވެފައެވެ. މިކަމަށް ރިއާޔަތްކޮށް، ކޯޓުން ހުކުމްކޮށްފައިވަނީ މި މަހުން ފެށިގެން ކުރިއަށް އޮތް 10 މަހު، ކޮންމެ މަހަކު 8،500 ރުފިޔާ ދައްކާ ގޮތަށް ރަނަށް ކިޔާފައިވާ ޖުމުލަ އަދަދު ދެއްކުމަށެވެ.

މި ހުކުމުން އެނގެނީ ކައިވެނީގެ ރަނަކީ ޝަރުޢީ ގޮތުން އަންހެނުންގެ ހައްގެއްކަމާއި، އެ ފައިސާ ދިނުމަކީ ފިރިހެނުންގެ މައްޗަށް ލާޒިމު ކަމެއްކަމެވެ. އަދި ރަން ނުދީ ލަސްވާ ހާލަތްތަކުގައި ކޯޓުން އެކަށީގެންވާ މުއްދަތެއް ދީ، ފައިސާ ދެއްކުމަށް ހުކުމްކުރާކަން ވެސް މި މައްސަލައިން ސާފުވެއެވެ.