ގޭންގު އަދި މަސްތުވާތަކެތީގެ އައްޑާތައް ދައުލަތަށް ނެގުމަށް ގާނޫނަށް ބަދަލު ގެންނަނީ
ހޯމް މިނިސްޓަރު އަލީ އިހުސާން
ގޭންގު އަދި މަސްތުވާތަކެތީގެ ކުށްތައް ކުރާ އައްޑާގެ ގޮތުގައި ބޭނުންކުރާ ތަންތަން ދައުލަތަށް ނެގުމަށް ގާނޫނަށް ބަދަލު ގެންނަން ނިންމައިފިއެވެ.
މިކަން އިއުލާނުކުރެއްވީ ހޯމް މިނިސްޓަރު އަލީ އިހުސާނެވެ.
މިނިސްޓަރު އިހުސާން ވިދާޅުވީ ބައެއް ފުލެޓުތަކާއި އެހެނިހެން ތަންތަން ތަކުރާރުކޮށް ކުށްކުރާ ތަންތަނުގެ ގޮތުގައި ފާހަގަކުރެވޭ ކަމަށެވެ. މިފަދަ ތަންތަނުގެ ވެރިންނާ ވާހަކަދައްކައި، ތަކުރާރުކޮށް މިފަދަ ކަންކަން ފެންނަނަމަ، ގާނޫނުގެ ތެރެއިން އެ ތަންތަން ދައުލަތަށް އަނބުރާ ނެގުމަށް މަސައްކަތްކުރާނެ ކަމަށް އޭނާ ވިދާޅުވިއެވެ.
މިއީ ގޭންގު ގާނޫނަށާއި މަސްތުވާތަކެތީގެ ގާނޫނަށް ގެންނަން ހުށަހަޅާފައިވާ އިސްލާހުތަކުގެ ތެރެއިން އެއް އިސްލާހު ކަމަށް މިނިސްޓަރު ފާހަގަކުރެއްވިއެވެ. އަދި ދިވެހިންގެ ސަލާމަތާއި ރައްކާތެރިކަމަށް އިސްކަންދޭ ކަމަށާއި، ކުށްކުރާ ފަރާތްތަކާ މެދު ހަރުކަށި ފިޔަވަޅު އަޅާނެ ކަމަށް ވެސް އޭނާ ވިދާޅުވިއެވެ.
މި ބަދަލުތަކުގެ ސަބަބުން ގާނޫނީ އިމުގެ ތެރެއިން ކުށްވެރިންގެ އަތުން ތަންތަން އަތުލައި، އެ ތަންތަން ދައުލަތުގެ ބެލުމުގެ ދަށަށް ގެނައުމަށް މަގުފަހިވާނެ ކަމަށް ބެލެވެއެވެ. މިއީ ކުށްކުރުން މަދުކޮށް، މުޖުތަމައުގެ ސަލާމަތާއި ރައްކާތެރިކަން އިތުރުކުރުމަށް އެޅޭ މުހިންމު ފިޔަވަޅެއް ކަމަށް ސަރުކާރުން ދެކެއެވެ.
ކޮމެންޓް