އޭސީޕީ އާސިފް ވަޒީފާއިން ސަސްޕެންޑުކޮށްފި

މޯލްޑިވްސް ކަރެކްޝަނަލް ސާވިސްގެ އެސިސްޓެންޓް ކޮމިޝަނާ އޮފް ޕްރިޒަންސް މުހައްމަދު އާސިފް ވަޒީފާއިން ވަގުތީގޮތުން ސަސްޕެންޑުކޮށްފިއެވެ. މިކަން ކޮށްފައިވަނީ އޭނާއާ ދެކޮޅަށް ކުރެވޭ ހިޔާނާތުގެ ތުހުމަތަކާ ގުޅިގެންނެވެ.

ކަރެކްޝަނަލް ސާވިސްއިން މުވައްޒަފުންނަށް ފޮނުވި އެންގުމެއްގައި ބުނެފައިވަނީ އިއްޔެ (7 ނޮވެމްބަރު) އިން ފެށިގެން އާސިފް ވަޒީފާއިން ސަސްޕެންޑުކޮށްފައިވާ ކަމަށެވެ. އަދި ހިއުމަން ރިސޯސް ސެކްޝަންގެ ހުއްދަ ނެތި އޭނާ ކަރެކްޝަނަލް ސާވިސްގެ އެއްވެސް އިމާރާތަކަށް ވަނުމަކީ މަނާކަމެއް ކަމަށް އެ އެންގުމުގައި ބަޔާންކޮށްފައިވެއެވެ .

މި މައްސަލައިގެ ފަހަތުގައިވަނީ މިދިޔަ ޖުލައި މަހު ފެންމަތިވި ޕްރިޒަންސް ކުލަބުގެ އެކައުންޓުން 200،000 ރުފިޔާއަށްވުރެ ގިނަ އަދަދެއްގެ ފައިސާ އެކި އެކައުންޓުތަކަށް ޖަމާކުރި ކަމަށް ބުނާ ހިޔާނާތުގެ މައްސަލައެކެވެ. ބައެއް މުވައްޒަފުން ތުހުމަތުކުރާ ގޮތުގައި މި ހިޔާނާތުގެ މުގުލުގައި ހުރީ އެ ކުލަބުގެ ރައީސްކަން ވެސް ކުރައްވާ އާސިފެވެ.

މި މައްސަލައާ ގުޅިގެން މިދިޔަ އޮގަސްޓު މަހު ކަރެކްޝަނަލް ސާވިސްގެ 35 އޮފިސަރަކު ސޮއިކޮށް ކޮމިޝަނާ އޮފް ޕްރިޒަންސް ހަސަން ޒަރީރަށް ޕެޓިޝަނެއް ހުށަހަޅާފައިވެއެވެ. އެ ޕެޓިޝަނަށް ދެއްވި ޖަވާބުގައި ޒަރީރު ވިދާޅުވެފައިވަނީ މައްސަލަ ބަލަމުން އަންނަ ކަމަށެވެ.

މައްސަލަ ފެންމަތިވުމާ ގުޅިގެން އާސިފް ވަނީ ދެ ޓްރާންސެކްޝަނަކުން ކްލަބްގެ އެކައުންޓަށް 70،000 ރުފިޔާ ޖަމާކޮށްފައެވެ. ނަމަވެސް މިއީ ކިހިނެއް ޖަމާވި ފައިސާއެއްކަން އަދި ސާފުވެފައެއް ނުވެއެވެ.

މި މައްސަލަ ދިގުލައިގެން ދިޔުމާއެކު، ބައެއް މުވައްޒަފުން ވަނީ މައްސަލަ "އޮއްބާލަން" އުޅޭ ކަމަށް ބުނެ ކަންބޮޑުވުން ފާޅުކޮށްފައެވެ. މިހާރު އާސިފް ވަޒީފާއިން ސަސްޕެންޑުކޮށްފައިވުމާއެކު، މައްސަލައިގެ ތަހުގީގު އިތުރަށް ކުރިއަށްދާނެ ކަމަށް ބެލެވެއެވެ.