ވޭޕް މަނާކުރުމާއި ބެހޭ ބިލް މަޖިލީހުގެ ކޮމިޓީން ފާސްކޮށްފި

ރާއްޖޭގައި ވޭޕް ބޭނުންކުރުން މަނާކޮށް، ދުންފަތުގެ ވިޔަފާރި ކުރެވޭނެ އެންމެ ހަގު އުމުރު 21 އަހަރަށް އުފުލުމަށް ހުށަހެޅުނު އިސްލާހު ރައްޔިތުންގެ މަޖިލީހުގެ އިޖުތިމާއީ ކޮމިޓީން ފާސްކޮށްފިއެވެ.

މި އިސްލާހު ތަންފީޒުކުރަން ފަށާނީ މި މަހުގެ 15 ވަނަ ދުވަހުން ފެށިގެންނެވެ.

ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު އަހުމަދު އައިފާން ހުށަހެޅުއްވި ބިލުގައިވާ ގޮތުން، މި މަހުގެ 15 ވަނަ ދުވަހުން ފެށިގެން ރާއްޖެއަށް ވޭޕް އެތެރެކުރުން މަނާވާނެއެވެ. އަދި ޑިސެންބަރު 15 ވަނަ ދުވަހުގެ ފަހުން ވޭޕް ބޭނުންކުރުމާއި ވިއްކުން ވެސް މަނާވާނެއެވެ.

މި ގާނޫނާ ޚިލާފުވާ ފަރާތްތަކަށް ބޮޑެތި ޖޫރިމަނާތަކެއް ކަނޑައަޅާފައިވެއެވެ. ވޭޕް ކުރުމަށް ބޭނުންކުރާ އާލާތްތަކާއި އުފެއްދުންތައް އެތެރެކުރުމުން 50,000 ރުފިޔާއިން ޖޫރިމަނާކުރެވޭނެއެވެ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް އާލާތަކަށް 10,000 ރުފިޔާގެ މަގުން ޖޫރިމަނާ ކުރެވޭނެއެވެ.

މީގެ އިތުރުން، އެފަދަ އާލާތެއް ނުވަތަ އުފެއްދުމެއް ވިއްކުމުން 20,000 ރުފިޔާގެ ޖޫރިމަނާއަކާއި ވިއްކި ކޮންމެ އެއްޗަކަށް 10,000 ރުފިޔާގެ ޖޫރިމަނާއެއް ކުރެވޭނެއެވެ. އަދި ހިލޭ ބެހުމުން 10,000 ރުފިޔާއިން ޖޫރިމަނާ ކުރެވޭނެއެވެ. ކުޑަކުއްޖަކަށް މިފަދަ އެއްޗެއް ވިއްކައިފިނަމަ ޖޫރިމަނާގެ އަދަދު 50,000 ރުފިޔާއަށް އިތުރުވާނެއެވެ.

މި ބިލް ދިރާސާކޮށް ނިންމުމަށް ކުރިން ކަނޑައަޅާފައިވަނީ މި މަހުގެ 23 ވަނަ ދުވަހާ ހަމައަށް ނަމަވެސް، މިއަދުގެ ބައްދަލުވުމުގައި ދިރާސާކޮށް ނިންމައި، ބިލް ވަނީ ފާސްކޮށްފައެވެ. މި ނިންމުމަކީ ދިވެހިރާއްޖޭގެ ދުންފަތުގެ އިސްތިޢުމާލު ކުޑަކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.