ގައުމީ ދިރާސާ ކައުންސިލް އުފައްދައި މެންބަރުން އައްޔަންކޮށްފި

ހަޔާ އެޑިޔުކޭޝަން، ލޭބަ އެންޑް ސްކިލްސް ޑިވެލޮޕްމަންޓް މިނިސްޓްރީ މެދުވެރިކޮށް "ގައުމީ ދިރާސާ ކައުންސިލް" ގެ ނަމުގައި ކައުންސިލެއް އެކުލަވާލައި އެ ކައުންސިލަށް މެމްބަރުން އައްޔަންކޮށްފިއެވެ.

މި ކައުންސިލަކީ ރާއްޖޭގެ އިލްމީ ދިރާސާ ކުރުމާއި އޭގެ އަލީގައި ފިކުރީ މުދާ އުފެއްދުމުގެ މަސައްކަތްތައް ހިންގައި ބެލެހެއްޓުމަށް އެކުލަވާލާފައިވާ ކައުންސިލެކެވެ. މި ކައުންސިލުގެ މައިގަނޑު މަސްއޫލިއްޔަތުތަކުގެ ތެރޭގައި ދިރާސާކުރާނެ ދާއިރާތައް ކަނޑައެޅުމާއި، ފަންޑުން ފައިސާ ދޫކުރާނެ ހަމަތަކެއް ގާއިމުކޮށް ތަންފީޒުކުރުން ހިމެނެއެވެ.

ކައުންސިލަށް މެންބަރުން އައްޔަންކޮށްފައިވަނީ ހަޔާ އެޑިޔުކޭޝަން މިނިސްޓްރީގައި ބޭއްވި ރަސްމިއްޔާތެއްގައެވެ. މެންބަރުންނަށް ލިޔުން ހަވާލުކޮށްދެއްވީ އެ މިނިސްޓްރީގެ ޕީއޭ އާއިޝަތު ހިކުމާއެވެ.

ކައުންސިލްގެ ޗެއާގެ ގޮތުގައި އައްޔަންކޮށްފައިވަނީ ސްޓޭޓް މިނިސްޓަރު އަހްމަދު ޝަފީއުއެވެ. އަދި މެންބަރުންގެ ގޮތުގައި ހަޔާ އެޑިޔުކޭޝަން މިނިސްޓްރީ، އެމްއެންޔޫ، އައިޔޫއެމް، އަދި އެހެނިހެން މުއައްސަސާތައް ތަމްސީލުކުރާ ފަރާތްތައް ހިމެނެއެވެ.

ގައުމީ ދިރާސާ ކައުންސިލެއް އުފެއްދުމަކީ ރައީސް ޑރ. މުހައްމަދު މުއިއްޒު ރައީސްކަމުގެ މަގާމުގެ ހުވާކުރެއްވުމުގެ ރަސްމިއްޔާތުގައި ވެވަޑައިގެންނެވި ވައުދެކެވެ. މި ކައުންސިލް އުފެއްދުމާއެކު އެ ވައުދު ފުއްދަވާފައިވާކަން ފާހަގަކުރެވެއެވެ.