ދުންފަތާއި ނިކޮޓިން އެކުލެވޭ ބާވަތްތަކުން ޑިއުޓީ އިނާޔަތް ދިނުން ހުއްޓާލައިފި

ދުންފަތް ނުވަތަ ނިކޮޓިން އެކުލެވޭ ބާވަތްތަކާއި އެފަދަ ތަކެތި ބުއިމަށް ބޭނުންކުރާ އާލާތްތަކުން ޑިއުޓީ އިނާޔަތް ދިނުން ހުއްޓާލައިފިކަމަށް މޯލްޑިވްސް ކަސްޓަމްސް އިން އިއުލާން ކޮށްފިއެވެ.

މިކަން ހާމަކޮށްފައިވަނީ ކޮމިޝަނާ ޖެނެރަލް އޮފް ކަސްޓަމްސް ފާތިމަތު ދިޔާނާ ކަސްޓަމްސްގެ މުވައްޒަފުންނަށް ފޮނުއްވި އުސޫލެއްގައެވެ.

މި ބަދަލާ ގުޅިގެން ރާއްޖެއަށް އަންނަ ފަތުރުވެރިންނަށް ސިނގިރޭޓު ކާޓޫނު އެތެރެ ނުކުރެވޭނެ އެވެ. އަދި ސިނގިރޭޓު ކާޓޫނާ އެކު ރާއްޖެ އަންނަ ފަތުރުވެރިން އެ ތަކެތި ކަސްޓަމްސްއާ ހަވާލު ކުރަންޖެހޭނެ އެވެ. އެ މީހުން ރާއްޖެއިން ފުރާއިރު ކަސްޓަމްސްއިން އަނބުރާ އެ ތަކެތި ހަވާލު ކުރާނެ އެވެ.

ދުންފަތާއި ނިކޮޓިން އެކުލެވޭ ބާވަތްތަކާއި ޝީޝާ އަދި އީ-ސިނގިރޭޓުން ޑިއުޓީ އިނާޔަތް ދިނުން ހުއްޓާލަން މީގެ ކުރިން ދެ ފަހަރަކު ތާރީހު ކަނޑައެޅި ނަމަވެސް އެ ސުންގަޑި ވަނީ ފަސްކުރެވިފައެވެ.

މިހާރު ފަތުރުވެރިއަކަށް ރާއްޖެ އަންނައިރު ގެނެވޭނީ 19 ސިނގިރޭޓު ހިމެނޭ ފޮށްޓެކެވެ. 19 ސިނގިރެޓަށް ވުރެ އިތުރަށް ހިމެނޭ ނަމަ ކަސްޓަމްސް އިން އެ ތަކެތި ހިފަހައްޓާނެއެވެ.

މި ބަދަލާ ގުޅިގެން، މި މަހުގެ 1 އިން ފެށިގެން ސިނގިރޭޓާއި ބިޑިން ނަގާ ޓެކްސް ބޮޑުކޮށް، އެ ތަކެތިން ނަގާ އިމްޕޯޓު ޑިއުޓީ ވެސް ބޮޑު ކުރުމަށް އިމްޕޯޓު އެކްސްޕޯޓުގެ ގާނޫނަށް އިސްލާހު ގެނެވިފައިވެއެވެ. އަދި ވޭޕްކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން މި މަހުގެ 15 އިން ފެށިގެން މަނާކުރުމަށް ނިންމައި، ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ގެނައުމުގެ މަސައްކަތް ދަނީ ކުރެވެމުންނެވެ.