ޣައްޒާއަށް އުންރުވާގެ އެހީ ކެނޑުމުން އާންމުންގެ ވޭން އިތުރުވާނެ: ޑަބްލިއުއެޗްއޯ ވެރިޔާ

އުންރުވާ މަނާކުރުމުން ޣައްޒާގެ އާންމުން ތަހައްމަލުކުރަމުންދާ ވޭން އިތުރުވެ، ބަލިމަޑުކަން ފެތުރިގެންދާނެ ކަމަށް ދުނިޔޭގެ ސިއްޙަތު ޖަމްޢިއްޔާ (ޑަބްލިއުއެޗްއޯ)ގެ ވެރިޔާ ޓެޑްރޯސް އަދްނޮމް ވިދާޅުވެއްޖެއެވެ.

އެކްސް މެދުވެރިކޮށް ކުރެއްވި ޕޯސްޓެއްގައި ޓެޑްރޯސް ވިދާޅުވެފައިވަނީ އުންރުވާގެ މަސައްކަތް ކުރެވޭނެ އެހެން ބަޔަކު ނެތް ކަމަށެވެ. އުންރުވާއާ އިސްރާއީލުން ގުޅުން ކަނޑާލި ނަމަވެސް ޣައްޒާއަކީ ރައްކާތެރި ތަނަކަށް ނުވާނެ ކަމަށާއި، އަދި އުންރުވާއިން ކުރާ މަސައްކަތްތައް އެހެން ބަޔަކަށް ނުކުރެވޭނެ ކަމަށް އޭނާ ވިދާޅުވިއެވެ.

ޓެޑްރޯސް މި ވާހަކަ ދައްކަވާފައިވަނީ އިސްރާއީލުން އުންރުވާއާ ގުޅުން ކަނޑާލަން ނިންމިކަން ރަސްމީކޮށް އދ. އަށް އެންގުމާ ގުޅިގެންނެވެ. ހަނގުރާމައިގެ ސަބަބުން ގެއްލުން ލިބިފައިވާ ޣައްޒާއަށް ދޭ ގާތްގަނޑަކަށް ހުރިހާ އެހީއެއް ކޯޑިނޭޓް ކުރާ އުންރުވާ ސަސްޕެންޑްކުރުމުން އިސްރާއީލުގެ އެންމެ ގާތް އެމެރިކާ ހިމެނޭހެން ގިނަ ގައުމުތަކަކުން ވަނީ އެކަން ކުށްވެރިކޮށްފައެވެ.

އުންރުވާއާމެދު އިސްރާއީލުން އަޅާ ފިޔަވަޅަށް އަމަލުކުރަން ފަށާނީ ޖެނުއަރީ މަހުގެ ފަހުކޮޅު ކަމަށް ބެލެވެއެވެ. އެކަމުގެ ސަބަބުން ފަލަސްތީނުގެ އެތައް މިލިއަން ބަޔަކަށް ބޮޑެތި ގެއްލުންތަކެއް ކުރިމަތިވާނެ ކަމަށް އދ. އިން ބުނެފައިވެއެވެ.

އިސްރާއީލުން އުންރުވާއާ ގުޅުން ކަނޑާލަން ނިންމީ، މިދިޔަ އަހަރުގެ އޮކްޓޫބަރު 7 ގައި ހަމާސްއިން އިސްރާއީލަށް ދިން ހަމަލާގައި އުންރުވާގެ މުވައްޒަފުންތަކެއް ބައިވެރިވެފައިވާ ކަމަށް ތުހުމަތުކުރެވޭތީއެވެ. އުންރުވާއަކީ 1949 ވަނަ އަހަރުން ފެށިގެން ޣައްޒާ، ހުޅަނގު އައްސޭރި، ލުބުނާން، އުރުދުން އަދި ސޫރިއާގައި ދިރިއުޅޭ ގާތްގަނޑަކަށް ހަ މިލިއަން ފަލަސްތީނުގެ ރެފިއުޖީންނަށް އެހީތެރިކަން ފޯރުކޮށްދޭ އދ. ގެ އޭޖެންސީއެކެވެ.