އަންނަ އަހަރުގެ ބަޖެޓަކީ ބޯހިޔާވަހިކަމުގެ ބަޖެޓެއް: ރައީސް މުއިއްޒު

އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ބަޖެޓަކީ ބޯހިޔާވަހިކަމުގެ ބަޖެޓެއް ކަމަށް ރައީސުލްޖުމްހޫރިއްޔާ މުޙައްމަދު މުއިއްޒު ވިދާޅުވެއްޖެއެވެ.

މިއަދު ބޭއްވުނު "ހިޔާވަހި" ލޯން ސްކީމް އިފްތިތާޙުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ސަރުކާރުން އަބަދުވެސް މަސައްކަތްކުރާނީ ރައްޔިތުންގެ ފަޅީގައި ތިބެގެން، ރައްޔިތުންނަށް އެންމެ މުހިންމު ކަންތައްތަކަށް އިސްކަންދީގެން ކަމަށެވެ.

ރައީސްގެ ވައުދާ އެއްގޮތަށް 5 އިންސައްތަ އިންޓަރެސްޓުގައި ބޯހިޔާވަހިކަމުގެ ލޯނު ދޫކުރުމުގެ ޕްރޮގްރާމް ފަށައިގަތުމާއެކު، މާދަމާއިން ފެށިގެން މި ލޯނަށް އެދި ހުށަހެޅުމުގެ ފުރުޞަތު ހުޅުވާލެވޭނެ ކަމަށް ރައީސް އިޢުލާނުކުރެއްވިއެވެ.

މި ސްކީމްގެ ސިޔާސަތަކީ ކޮންމެ ރަށެއްގައި ހުރި ނަމަވެސް، އެ މީހެއްގެ އަމިއްލަ ގޯތި ނުވަތަ ބިން ނުވަތަ އިމާރާތް ދިރިއުޅެވޭ ވަރުގެ ބޯހިޔާވަހިކަމަކަށް ހެދުމަށް އެހީތެރިކަން ފޯރުކޮށްދިނުން ކަމުގައި ރައީސް ފާހަގަކުރެއްވިއެވެ.

އަންނަ އަހަރުގެ ބަޖެޓުގައި މި ސްކީމަށް 1 ބިލިއަން ރުފިޔާ ކަނޑައަޅާފައިވާ ކަމަށާއި، އެޗްޑީއެފްސީ، ބީއެމްއެލް ނުވަތަ އެމްއައިބީ މެދުވެރިކޮށް ލޯނު ދޫކުރެވޭނެ ކަމަށް ރައީސް ވިދާޅުވިއެވެ. މީގެ އިތުރުން، ސަރުކާރުގެ ބަޖެޓުން ކަނޑައަޅާ 1 ބިލިއަން ރުފިޔާއާއެކު، 2 ބިލިއަނަށްވުރެ ގިނަ ރުފިޔާ މި ސްކީމުގެ ދަށުން ކޮންމެ އަހަރަކު ދޫކުރެވޭނެ ކަމަށްވެސް ރައީސް ހާމަކުރެއްވިއެވެ.

ރައީސް މުއިއްޒު އިތުރަށް ވިދާޅުވީ މި ލޯނުގެ ސަބަބުން ގިނަ ފަރާތްތަކަށް އެ މީހުންގެ ގޯތީގައި ގެ އެޅުމުގެ ފުރުޞަތު ލިބިގެންދާނެ ކަމަށާއި، ގެ އަޅަން ފަށާފައި ނުނިމި ހުރި ފަރާތްތަކަށްވެސް ގެ ނިންމާލުމުގެ ފުރުޞަތު ލިބިގެންދާނެ ކަމަށެވެ. އަދި މާލޭގައި ނަމަ، ބެހެނިވެރިން އެކުވެގެން 6-10 މިލިއަނާ ދެމެދުގެ އަދަދެއް ލިބި، ގެ އެއްކޮށް ނިންމާލުމުގެ ފުރުޞަތު ލިބިގެންދާނެ ކަމަށްވެސް ރައީސް ފާހަގަކުރެއްވިއެވެ.