ޔުނައިޓެޑްގެ ކޯޗުކަމާ ހަވާލުވަނީ ފައިސާއަކަށް ނޫން: އަމޮރިމް

ރުބެން އަމޮރިމް

މެންޗެސްޓާ ޔުނައިޓެޑްގެ ކޯޗުކަމާ ހަވާލުވާން ލިބުނު އޮފަރ ޤަބޫލުކުރީ ފައިސާއަށް ނޫން ކަމަށާއި އެއީ އަބަދުވެސް ބޭނުންވެފައި ހުރި ފުރުސަތެއް ކަމަށް އެ ޓީމުގެ ކޯޗުކަމާ ހަވާލުވާން ތައްޔާރުވަމުން އަންނަ ރުބެން އަމޮރިމް ބުނެފިއެވެ.

އަމޮރިމް، 39، ކޯޗަކަށް ގެންނަން ޔުނައިޓުން ހުރިހާ ކަމެއް ނިންމައި، އިޢުލާނުކުރި ނަމަވެސް އޭނާއަށް ޔުނައިޓެޑްގެ ކޯޗުގެ ޒިންމާއާ ހަވާލުވެވޭނީ 10 ދުވަސް ފަހުން ކަމަށް ޔުނައިޓެޑުން ވަނީ ބުނެފައެވެ.

ސްޕޯޓިންގެ އެއްބަސްވުމުގައިވާ ނޯޓިސް މުއްދަތު ހަމަކޮށް، މި މަހުގެ 11 ވަނަ ދުވަހު، އަމޮރިމް ޔުނައިޓެޑާ އެކު މަސައްކަތް ފަށާނީ 2027 ވަނަ އަހަރުގެ ޖޫން މަހުގެ ނިޔަލަށް އޮތް ކޮންޓްރެކްޓެއްގައެވެ. ޔުނައިޓެޑާ ހަވާލުވާން ނިންމައި، މި ހޭދަކުރި ހަފުތާއެއްހާ ދުވަހަކީ އޭނާގެ ހަޔާތުގައި ހަނދާނުން ފޮހެލަން ދަތި ދުވަސްތަކެއް ކަމަށް އަމޮރިމް ވަނީ ބުނެފައެވެ.

އަމޮރިމް ބުނެފައިވަނީ ޔުނައިޓެޑަކީ ދުނިޔޭގެ އެންމެ ބޮޑު އެއް ކްލަބް ކަމަށާއި، އެހެން ކްލަބްތަކުން އޭނާއަށް އެތައް ގުނައެއް ރަނގަޅު މުސާރަ ދޭން އެއްބަސްވެފައި އޮތް ނަމަވެސް، ޔުނައިޓެޑާ ގުޅުނީ ފައިސާއަށް ނޫން ކަމަށެވެ. އޭނާ ބުނީ ޔުނައިޓެޑާ ގުޅުނީ އެ ކްލަބް އޮތް ހާލަތާއި ޕްރޮޖެކްޓަށް ގަޔާވެގެން ކަމަށެވެ.

ސްޕޯޓިންގެ ޑިރެކްޓަރު، ހޫގޯ ވިއާނާ، މި ސީޒަން ނިމުމުން މެންޗެސްޓާ ސިޓީގެ އެ މަޤާމާ ހަވާލުވާއިރު، އަމޮރިމް އަންނަ ހަފުތާގައި ގުޅެނީ ސިޓީގެ ވާދަވެރި ޔުނައިޓެޑާއެވެ. އަމޮރިމް ބުނެފައިވަނީ، އޭނާއާއި ވިއާނާއާ ދެމެދު އޮންނަ ގުޅުން އަބަދުވެސް ދެމިއޮންނާނެ ކަމަށެވެ.

މެންޗެސްޓަރ ޔުނައިޓެޑް