ސީއެޗްއެސްއީ މާލޭ އިމާރާތް ރައީސް މުއިއްޒު ރަސްމީކޮށް ހުޅުއްވައިދެއްވައިފި

މާލޭގައި އޭލެވެލްއަށް ކިޔަވައިދެމުން އައި ހަމައެކަނި ސަރުކާރު ސްކޫލް، ސީއެޗްއެސްއީ ރަސްމީކޮށް ރައީސް މުހައްމަދު މުއިއްޒު ރޭ އަލުން ހުޅުއްވައިދެއްވައިފި އެވެ.

މިއީ ގާތްގަނޑަކަށް 40 އަހަރަށް ވުރެ ދިގު މާޒީއެއް އޮތް ސްކޫލެކެވެ. މި ސްކޫލް މާލޭ އިމާރާތް ބަންދުކޮށް، ހުޅުމާލޭގައި އަލަށް ހެދި އިމާރާތަށް ދަރިވަރުންގެ ކިޔެވުން ބަދަލު ކުރީ މީގެ އަހަރެއް ކުރިންނެވެ.

މި ސަރުކާރު ވެރިކަމަށް އައުމަށްފަހު، ދަރިވަރުންނާއި ބެލެނިވެރިންގެ އެދުމުގެ މަތިން، މާލޭގެ އިމާރާތުގައި ވެސް ކިޔަވައިދޭން ނިންމި އެވެ. އެގޮތުން މިދިޔަ ސެޕްޓެމްބަރު މަހުގެ ތެރޭގައި 400 އަށް ވުރެ ގިނަ ދަރިވަރުންނާ އެކު ވަނީ އެ ތަނުގައި ކިޔަވައިދޭން ފަށައިފަ އެވެ.

ރޭގެ ރަސްމިއްޔާތުގައި ރައީސް މުއިއްޒު، ސްކޫލް ހުޅުވައިދެއްވުމުގެ ކުރިން ސީއެޗްއެސްއީގެ ދަރިވަރުންގެ ފަރާތުން އެ މަނިކުފާނަށް ސްކޫލްގެ އެހާރާއި މިހާރުގެ ހަނދާނީ ރަމްޒެއް އަރުވާފައިވެ އެވެ. ރައީސް މުއިއްޒަކީ ވެސް އެ ސްކޫލްގެ މުސްކުޅި ދަރިވަރެކެވެ.

އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ، ސީއެޗްއެސްއީ މާލޭ އިމާރާތުގައި ކިޔަވައިދިނުމަށް ސަރުކާރުން ނިންމި ނިންމުމަކީ ގާތުން ތައުލީމް ދިނުމުގެ ސިޔާސަތު ހަރަދަނާ ވެގެން ދިޔަ ނިންމުމެއް ކަމަށެވެ. އަދި މާލޭ ސީއެޗްއެސްއީ ހުޅުވުމަށް ވަރަށް ގިނަ ސިޓީތަކާއި ވަރަށް ގިނަ އާދޭހުގެ އެދުންތައް ބެލެނިވެރިންގެ ފަރާތުން މިނިސްޓްރީއަށް ލިބެމުންދިޔަ ކަމަށް އޭނާ ވިދާޅުވި އެވެ.

ސަރުކާރުން ވަނީ މާލޭ ސްކޫލް ހުޅުވި ނަމަވެސް ކުރިއެކޭ ވެސް އެއްގޮތަށް ހުޅުމާލޭ ސީއެޗްއެސްއީގައި އޭލެވަލް ކިޔެވުން ކުރިއަށް ގެންދިޔުމަށް ނިންމާފައެވެ. މިކަމަކީ ދަރިވަރުންނަށާއި ބެލެނިވެރިންނަށް ލިބިގެންދިޔަ ވަރަށް ބޮޑު ލުޔެއް ކަމަށް ބެލެވެއެވެ.