މާފަރު ކައުންސިލް ވެޓަރަންސް ޗެލެންޖް: އެންމެ މޮޅު ކުޅުންތެރިއަކަށް އަމީން

މާފަރު ކައުންސިލުން އިސްނަގައިގެން ބޭއްވި “ވެޓަރަންސް ޗެލެންޖް”ގެ އެންމެ މޮޅު ކުޅުންތެރިޔާގެ މަޤާމު މުޙައްމަދު އަމީން މުމްތާޒު ހޯދައިފިއެވެ.

މި މުބާރާތުގައި ޖުމްލަ 4 ޓީމު ވާދަކުރިއިރު، މުޙައްމަދު އަމީން ފެނިގެން ދިޔައީ އެމްއެސް މޭޓްސް އިންނެވެ. އެ ޓީމުގެ ގޯލް ބެލެހެއްޓުމުގައި އަމީންގެ ފަރާތުން މޮޅު ކުޅުމެއް ފެނިގެން ދިޔައިރު، މި މުބާރާތުގެ ދެ މެޗެއްގެ އެންމެ މޮޅު ކުޅުންތެރިޔާގެ މަޤާމުވެސް އަމީން ވަނީ ހޯދާފައެވެ.

ޢުމުރުން 35 އަހަރުން މަތީގެ މީހުންނަށް އަމާޒުކޮށްގެން ބޭއްވި މި މުބާރާތަކީ މާފަރު ކައުންސިލުން ބޭއްވި މިފަދަ ފުރަތަމަ މުބާރާތެވެ.

މި މުބާރާތުގެ ފައިނަލް މެޗް އިއްޔެ ކުޅެފައިވާއިރު ފައިނަލްގައި ބައްދަލު ކުރީ އެމްއެސް މޭޓްސް އަދި ނަމްބަރ 1 އެފްސީއެވެ. މި މުބާރާތުގެ ފައިނަލަށް އެމްއެސް މޭޓްސް ދަތުރު ކުރީ ކުޅުނު އެއްވެސް މެޗަކުން ބަލި ނުވެއެވެ. އެ ޓީމު ކުޅުނު ހުރިހާ މެޗެއްގައިވެސް އަމީންގެ ހުނަރުވެރިކަން ފެނިފައިވާއިރު، އަމީން އަކީ އޭނާގެ ޒުވާން ޢުމުރުގައިވެސް މުޅި އަތޮޅަށް ވިދާލި މޮޅު ކުޅުންތެރިއެކެވެ. ދަނޑުމަތީގައި އެންމެ ހަލުވި ކުޅުންތެރިޔާގެ ނަމުން މަޝްހޫރުވެ، ރަށާއި އަތޮޅަށް ރީތިނަން ހޯދައިދިނުމުގައި އަމީން ވަނީ އިސް ދައުރެއް އަދާކޮށްފައެވެ.

މާފަރު ކައުންސިލް ވެޓަރަންސް ޗެލެންޖްގައި ހޮވި އެންމެ މޮޅު ހަ ކުޅުންތެރިންގެ ތެރޭގައިވެސް އަމީން ހިމެނެއެވެ.

މުބާރާތުގައި ވާދަކުރި 4 ޓީމް:

• އެމްއެސް މޭޓްސް

• ނަމްބަރ 1 އެފްސީ

• ފެންނަނުފެންނަ

• އެޑަލްޓް އެފްސީ