ހެރިސް ވޯޓުލައްވައިފި، އެމެރިކާގެ ރިޔާސީ އިންތިޚާބުގެ އެންމެ ފަހުގެ ތައްޔާރީތައް ފެށިއްޖެ

އެމެރިކާގެ ރިޔާސީ އިންތިޚާބުގައި ވެރިކަން ކުރާ ޑިމޮކްރެޓިކް ޕާޓީގެ ފަރާތުން ވާދަކުރައްވާ ކެނޑިޑޭޓު، ނައިބު ރައީސާ ކަމަލާ ހެރިސް ވޯޓު ލައްވައިފިއެވެ.

ހެރިސް ވޯޓު ލައްވާފައިވަނީ އަރލީ ވޯޓިންގ ނުވަތަ ކުރީބައިގައި ވޯޓު ދިނުމުގެ ފުރުޞަތުގެ ދަށުން، މެއިލް ނުވަތަ ޕޯސްޓު މެދުވެރިކޮށެވެ.

ހެރިސާއި، އިންތިޚާބުގައި އޭނާއާ ވާދަކުރައްވާ އިދިކޮޅު ރިޕަބްލިކަން ޕާޓީގެ ކެނޑިޑޭޓު، ކުރީގެ ރައީސް ޑޮނަލްޑް ޓްރަމްޕް މިހާރު ގެންދަވަނީ އިންތިޚާބަށް އެންމެ ފަހުގެ ތައްޔާރީތައް ކުރައްވަމުންނެވެ. އަދި، ތާޢީދު އިތުރު ކުރުމަށް އެންމެ ފަހުގެ ކެމްޕޭން ޖަލްސާތައް ބާއްވަވަމުންނެވެ.

މިޝިގަނާއި ޕެންސިލްވޭނިޔާއަކީ މި އަހަރުގެ އިންތިޚާބުގައި "ސްވިންގ ސްޓޭޓް"ތަކުގެ ގޮތުގައި ބެލެވޭ ދެ ސްޓޭޓެވެ. އެންމެ ފަހުން ނަގާފައިވާ ޚިޔާލު ހޯދުމުގެ ވޯޓުތަކުގެ ނަތީޖާއަށް ބަލާއިރު، ހެރިސާއި ޓްރަމްޕްގެ ތެރެއިން އެއްވެސް ކެނޑިޑޭޓަކަށް ކުރި ހޯދިފައެއް ނެތެވެ.

ޔުނިވަރސިޓީ އޮފް ފްލޮރިޑާގެ އިލެކްޝަން ލެބުން ހާމަކޮށްފައިވާ ތަފާސްހިސާބުތަކަށް ބަލައިލާއިރު، އަރލީ ވޯޓިންގގެ ފުރުޞަތު ބޭނުންކޮށް، މިހައިތަނަށް ވޯޓު ލާފައިވާ މީހުންގެ އަދަދު 78 މިލިޔަނަށް އަރައެވެ. އެއީ، 2020ވަނަ އަހަރުގެ ރިޔާސީ އިންތިޚާބުގައި އެ ފުރުޞަތު ބޭނުންކޮށްގެން ވޯޓުލާފައިވާ މީހުންގެ އަދަދު ކަމުގައިވާ 160 މިލިޔަނާ އަޅައިބަލާއިރު ދެބައިކުޅަ އެއްބައެވެ.

ނޮވެންބަރު 5 ވަނަ ދުވަހު އެމެރިކާގެ ޤާނޫނު ހަދާ މަޖިލިސް، ކޮންގްރެސްގައި ހުސްވެފައިވާ ގޮނޑިތަކުގެ އިންތިޚާބު ވެސް، ރިޔާސީ އިންތިޚާބާ އެކުއެކީގައި ކުރިއަށް ދާނެއެވެ. ޚިޔާލު ހޯދުމުގެ ވޯޓުތަކުގެ ނަތީޖާއިން ފެންނަނީ، ކޮންގްރެސްގެ މަތިގެ، ސެނެޓުގެ ވޯޓު ކާމިޔާބު ކުރާނީ ރިޕަބްލިކަން ޕާޓީން ކަމުގައެވެ.