2025 ވަނަ އަހަރުގެ ބަޖެޓު މަސައްކަތް 20 ނޮވެމްބަރުގެ ކުރިން ނިންމަން ފާސްކޮށްފި

ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ 2025 ވަނަ އަހަރުގެ ބަޖެޓުގެ މަސައްކަތް މި މަހުގެ 20 ވަނަ ދުވަހުގެ ކުރިން ނިންމުމަށް މަޖިލީހުގެ ބަޖެޓު ދިރާސާކުރާ ކޮމިޓީން މިއަދު ފާސްކޮށްފިއެވެ.

ސަރުކާރުން ވަނީ އަންނަ އަހަރަށް ލަފާކޮށް ޖުމުލަ 56.6 ބިލިއަން ރުފިޔާގެ ބަޖެޓެއް ހުށަހަޅާފައެވެ.

ބަޖެޓުގެ މަސައްކަތް ނިންމާނެ ތާރީޚެއްގެ ގޮތުގައި މި މަހުގެ 20 ވަނަ ދުވަސް ކަނޑައެޅުމަށް ހުށަހެޅުއްވީ ހަނިމާދޫ ދާއިރާގެ އެމްޑީޕީ މެންބަރު އަބްދުލްގަފޫރު މޫސާއެވެ. މި ހުށަހެޅުމަށް ބާރަށު ދާއިރާގެ މެންބަރު އިބްރާހިމް ޝުޖާއު ތާއީދުކުރެއްވުމާއެކު، ކޮމިޓީ މެންބަރުންގެ އިއްތިފާގުން މި ތާރީޚު ފާސްކުރެވުނެވެ.

ކޮމިޓީން ވަނީ އޮޑިޓަރ ޖެނެރަލް އަދި ގަވަރުނަރުގެ ބަޖެޓާ ގުޅޭ ޚުލާސާ ބަޔާން ހޯދުމަށާއި، މިނިވަން މުއައްސަސާތަކާއި ސަރުކާރުގެ އިދާރާތަކުން ހޯދަންޖެހޭ އިދާރީ ލިޔެކިޔުންތައް ހޯދުމަށް އިދާރާތަކަށް ސިޓީ ފޮނުވުމަށް ވެސް ނިންމާފައެވެ.

މިއަދުގެ ބައްދަލުވުމުގައި ކޮމިޓީގެ މުގައްރިރާއި ނައިބު މުގައްރިރު ވެސް ހޮވާފައިވެއެވެ. އެގޮތުން، ކޮމިޓީގެ މުގައްރިރަކަށް ހޮވާފައިވަނީ ފުވައްމުލަކު މެދު ދާއިރާގެ މެންބަރު އަލީ ފާޒާދެވެ. އަދި ނައިބު މުގައްރިރަކަށް ހޮވިފައިވަނީ އޭދަފުށީ ދާއިރާގެ މެންބަރު އަހުމަދު ސަލީމެވެ.

އަންނަ އަހަރަށް ލަފައިކުރާ ބަޖެޓުގެ ޖުމުލަ ޚަރަދަކީ 49.2 ބިލިއަން ރުފިޔާއެވެ. އޭގެ ތެރެއިން ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާ އަދި ކެޕިޓަލް ޚަރަދުގެ ގޮތުގައި 13.3 ބިލިއަން ރުފިޔާ ހިމެނެއެވެ. އަންނަ އަހަރުގެ ޖުމުލަ އާމްދަނީއާއި ހިލޭ އެހީ 39.8 ބިލިއަން ރުފިޔާއަށް އަރާނެ ކަމަށް އަންދާޒާކޮށްފައިވާއިރު، އޭގެ ތެރޭގައި ހިލޭ އެހީގެ ގޮތުގައި 2.5 ބިލިއަން ރުފިޔާ ހިމެނެއެވެ.