ޝަހީދުންގެ އާއިލާތަކަށް މާލީ އެހީއާއި ބޯހިޔާވަހިކަން ފޯރުކޮށްދޭނެކަމަށް ރައީސް ވިދާޅުވެއްޖެ

މިހާތަނަށް އެކި ހާދިސާތަކުގައި ޝަހީދުވި ފަރާތްތަކުގެ އާއިލާތަކަށް މާލީ އެހީއާއި ބޯހިޔާވަހިކަން ފޯރުކޮށްދެއްވާނެ ކަމަށް ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ނަޞްރުގެ ދުވަހުގެ މުނާސަބަތުގައި ރޭ ދަރުބާރުގޭގައި ބޭއްވި ޚާއްޞަ ރަސްމިއްޔާތުގައި، ރައީސް ޑރ. މުޢިއްޒު ވިދާޅުވީ، 3 ނޮވެމްބަރު 1988 ގައި ރާއްޖެއަށް ދިން އުދުވާނީ ހަމަލާގައި 19 ދިވެހިން ޝަހީދުވެފައިވާ ކަމަށާއި، މީގެ އިތުރުން މިދިޔަ 40 އަކަށް އަހަރު ތެރޭގައި އެކި ހާދިސާތަކުގައި 29 ސިފައިންނާއި ދެ ފުލުހުން ވެސް ޝަހީދުވެފައިވާ ކަމަށެވެ.

ރައީސް ފާހަގަކުރެއްވި ގޮތުގައި، މިފަދަ ޝަހީދުންގެ އާއިލާތަކަށް ފަހަކަށް އައިސް ސަރުކާރުން އެކަށީގެންވާ އެހީތެރިކަމެއް ފޯރުކޮށްދީފައި ނުވާކަމީ ވަރަށް ބޮޑު ބޭއިންސާފެކެވެ. މިކަން ރަނގަޅު ކުރުމުގެ ގޮތުން، މިއަންނަ އަހަރުން ފެށިގެން ޝަހީދުވި ފަރާތްތަކުގެ އާއިލާތަކަށާއި، ތިނެއް ނޮވެމްބަރުގެ ހަނގުރާމައިގައި ހިތްވަރުގަދަކަމުގެ މެޑެލް ލިބިފައިވާ ފަރާތްތަކަށް ސަރުކާރުން ޚާއްޞަ އެލަވަންސެއް ދޭނެ ކަމަށް ރައީސް އިޢުލާންކުރެއްވިއެވެ.

މީގެ އިތުރުން، ޝަހީދުންގެ އާއިލާތަކަށް ޚާއްޞަކޮށް 50 ހައުސިންގ ޔުނިޓް ހިމެނޭ "ޝަހީދުންގެ ހިޔާ" ގެ ނަމުގައި އިމާރާތެއް ކުރިއަށް އޮތް އަހަރުތަކުގައި އަޅައި ނިންމައި، މި އާއިލާތަކާ ހަވާލުކުރާނެ ކަމަށްވެސް ރައީސް ވިދާޅުވިއެވެ.

ރައީސް މުޢިއްޒު ވިދާޅުވި ގޮތުގައި، މިފަދަ އެހީތެރިކަމަކުން ޝަހީދުންގެ އާއިލާތަކުގެ ހިތާމައަށް ފުރިހަމަ ލުޔެއް ނުލިބުނު ކަމުގައިވިޔަސް، މިއީ އެންމެ ކުޑަމިނުން ކޮށްދޭންޖެހޭ ކަމެއް ކަމުގައި އެމަނިކުފާނު ޤަބޫލުކުރައްވާ ކަމަށެވެ.